ദള്‍ യോഗം ചേരുന്നു; യുഡിഎഫ് പ്രവേശനം മുഖ്യ അജണ്ട

കോഴിക്കോട്: ജനതാദള്‍ സംസ്ഥാന നിര്‍വാഹക സമതിയോഗം ചൊവ്വാഴ്ച കോഴിക്കോട് ചേരും. ദേശീയതലത്തില്‍ കോണ്‍ഗ്രസിനെ പിന്തുണയ്ക്കാനെടുത്ത നിലപാടിന്‍റെ ചുവടുപിടിച്ചു കേരളത്തില്‍ യുഡിഎഫില്‍ പ്രവേശിക്കുന്ന കാര്യം യോഗം ചര്‍ച്ച ചെയ്യും.

സംസ്ഥാന അധ്യക്ഷന്‍ എംപി വീരേന്ദ്ര കുമാറിന്റെ അധ്യക്ഷതയില്‍ ചേരുന്ന യോഗത്തില്‍ എംഎല്‍എമാരായ മാത്യു ടി തോമസും ജോസ് തെറ്റയിലും ഉള്‍പ്പെടുന്ന വിമത പക്ഷം പങ്കെടുക്കില്ല.

കഴിഞ്ഞ തിരഞ്ഞെടുപ്പില്‍ എല്‍ഡിഎഫിന് വേണ്ടി പ്രവര്‍ത്തിച്ച ജില്ലാ പ്രസിഡന്റുമാരെയും സംസ്ഥാന ഭാരവാഹികളെയും യോഗത്തിലേക്ക് ക്ഷണിച്ചിട്ടില്ലെന്നും യുഡിഎഫിലേക്ക് ചേക്കേറുന്നതിന് കളമൊരുക്കുക എന്നതാണ് കോഴിക്കോട്ട് നടക്കുന്ന യോഗത്തിന്റെ ഉദ്ദേശമെന്നും ജോസ് തെറ്റയില്‍ എംഎല്‍എ ആരോപിച്ചു.

ദേശീയ നേതൃത്വത്തെ ധിക്കരിച്ചും സംസ്ഥാന കമ്മിറ്റിയുടെ അനുമതിയില്ലാതെയുമാണ് വീരേന്ദ്ര കുമാര്‍ വിഭാഗം എല്‍ഡിഎഫിനെതിരെ പ്രവര്‍ത്തിച്ചതെന്നും വിമത വിഭാഗം പറയുന്നു. ക്ഷണിച്ചാല്‍ എല്‍ഡിഎഫ് യോഗത്തില്‍ പങ്കെടുക്കുമെന്നും ജോസ് തെറ്റയില്‍ വ്യക്തമാക്കിയിട്ടുണ്ട്.