റീട്ടെയ്‌ല്‍ ഭീമന്‍ വാള്‍മാര്‍ട്ട്‌ ഇന്ത്യയിലെത്തി

ദില്ലി: ലോകത്തെ ഒന്നാം നമ്പര്‍ ചെറുകിട വ്യാപാര ശൃംഖലയായ വാള്‍മാര്‍ട്ടിന്റെ ശാഖ ഇന്ത്യയില്‍ തുറന്നു. പഞ്ചാബിന്റെ ധ്യാനപ്പുരയെന്ന്‌ അറിയപ്പെടുന്ന അമൃത്സറിലാണ്‌ വ്യാപാര ഭീമന്‍ ആദ്യ ഔട്ട്‌ലെറ്റ്‌ തുറന്നിരിയ്‌ക്കുന്നത്‌.

കോടികള്‍ മറിയുന്ന ഇന്ത്യന്‍ ചെറുകിട വ്യാപാര രംഗത്തെ ഏറെ നാളായി നോട്ടമിട്ടിരിയ്‌ക്കുന്ന അമേരിക്കന്‍ ഭീമന്‍ ഭാരതി എയര്‍ടെല്ലുമായി ചേര്‍ന്ന്‌ ബെസ്‌റ്റ്‌ പ്രൈസ്‌ മേഡേണ്‍ ഹോള്‍സെയില്‍ എന്ന പേരിലാണ്‌ ഇവിടെ എത്തിയിരിക്കുന്നത്‌.

ഏഴുവര്‍ഷത്തിനിടെ ഇന്ത്യയില്‍ 15 സ്‌റ്റോറുകള്‍ തുടങ്ങാനാണു വാള്‍മാര്‍ട്ട്‌ പദ്ധതി. കാഷ്‌ ആന്‍ഡ്‌ കാരി ഫോര്‍മാറ്റ്‌ പദ്ധതി പ്രകാരമാണ്‌ വാള്‍മാര്‍ട്ട്‌ ഇന്ത്യയിലെത്തുന്നത്‌. ഷോപ്പുകള്‍ക്ക്‌ ഉത്‌പന്നങ്ങള്‍ വില്‍ക്കുന്നതാണ്‌ ഈ പദ്ധതി. 50,000 100,000 സ്‌ക്വയര്‍ ഫീറ്റ്‌ വിസ്‌തൃതിയിലാവും ഷോപ്പുകള്‍. പഴങ്ങള്‍, പച്ചക്കറികള്‍, ഫുട്‌വെയര്‍, വസ്‌ത്രങ്ങള്‍, പലചരക്കു സാധനങ്ങള്‍ എന്നിവ സ്‌റ്റോറുകള്‍ വഴി വില്‍ക്കും.

അതിവേഗം മുന്നോട്ട്‌ കുതിയ്‌ക്കുന്ന സമ്പദ്‌ വ്യവസ്ഥയും ഇന്ത്യയിലെ 120 കോടിയുടെ ജനസംഖ്യയുമാണ് വാള്‍മാര്‍ട്ടിനെ ഇന്ത്യയിലേക്ക്‌ ആകര്‍ഷിച്ചത്‌.