മംഗലാപുരം എക്സ്പ്രസ് പ്രതിദിനമാക്കും: അഹമ്മദ്
ചെന്നൈ: കേരളത്തിന്റെ റെയില്വേ വികസനത്തിനായി പരമാവധികാര്യങ്ങള് ചെയ്യുമെന്ന് കേന്ദ്ര റെയില്വേസഹമന്ത്രി ഇ അഹമ്മദ്. മന്ത്രിയായി സ്ഥാനമേറ്റശേഷം ആദ്യമായി ചെന്നൈയിലെത്തിയതായിരുന്നു അദ്ദേഹം.
ദക്ഷിണ റെയില്വേയിലെ ഉന്നത ഉദ്യോഗസ്ഥരുമായി മന്ത്രി ചര്ച്ച നടത്തി. നുങ്കമ്പാക്കം റെയില്വേ ഭവനില് ദക്ഷിണ റെയില്വേ ജനറല് മാനേജര് എംഎസ് ജയന്ത് ഉള്പ്പെടെയുള്ള ഉദ്യോഗസ്ഥരുമായി അദ്ദേഹം ഒരു മണിക്കൂറോളം ചര്ച്ച നടത്തി. ചെന്നൈയില് നിന്നും കേരളത്തിലേയ്ക്കുള്ള യാത്രാ ദുരിതം അവസാനിപ്പിക്കുന്നതിനായി നടപടിയുണ്ടകുമെന്ന് അദ്ദേഹം അറിയിച്ചു.
ഇതിനായി ചെന്നൈയില് നിന്നും മംഗലാപുരത്തേയ്ക്ക് ആഴ്ചയില് മൂന്നുദിവസം സര്വ്വീസ് നടത്തുന്ന മംഗലാപുരം എക്സ്പ്രസ് പ്രതിദിന സര്വ്വീസാക്കി മാറ്റാന് നടപടി സ്വീകരിക്കും. ചെന്നൈയില് നിന്നും മലബാര് മേഖലയിലേയ്ക്കുള്ള യാത്രാക്ലേശം ശ്രദ്ധയില്പ്പെട്ടിട്ടുണ്ട്- അദ്ദേഹം പറഞ്ഞു.
ദക്ഷിണ റയില്വേയില് നടന്നുകൊണ്ടിരിക്കുന്ന വികസനപ്രവര്ത്തനങ്ങള് സമയബന്ധിതമായി പൂര്ത്തീകരിക്കുമെന്നും അഹമ്മദ് അറിയിച്ചു. ചുമതലയേറ്റതേയുള്ളുവെന്നും കാര്യങ്ങളെല്ലാം വിശദമായി പഠിക്കേണ്ടതുണ്ടെന്നും അദ്ദേഹം പറഞ്ഞു.