20കോടി ചെലവില്‍ മന്ത്രിപുത്രന്‌ കല്യാണം

ബെല്ലാരി: ഇരുപതു കോടി രൂപ ചെലവഴിച്ച്‌ മന്ത്രി പുത്രന്‌ കല്യാണം. കര്‍ണാടകത്തിലെ ആരോഗ്യമന്ത്രി ബി ശ്രീരാമലുവാണ്‌ മകനും എംഎല്‍എയുമായ ടിഎച്ച്‌ സുരേഷ്‌ ബാബുവിന്റെ വിവാഹം പണം വാരിവിതറി പൊടിപൊടിച്ചത്‌.

ഇതിനകം തന്നെ സംഭവം വിവാദമായിക്കഴിഞ്ഞു. കള്ളപ്പണമാണ്‌ വിവാഹത്തിനായി ഒഴുക്കിയതെന്നാണ്‌ ആരോപണം. ബെല്ലാരി കന്റോണ്‍മെന്റില്‍ നാല്‍പ്പതിനായിരം പേരെ സാക്ഷിയാക്കി നടന്ന ചടങ്ങിന്‌ ബാംഗ്ലൂരില്‍ നിന്നും വിഐപികളെ എത്തിച്ചത്‌ നാല്‌ ഹെലികോപ്‌റ്ററിലാണത്രേ.

മുഖ്യമന്ത്രി ബിഎസ്‌ യദ്യൂരപ്പയുള്‍പ്പെടെ കര്‍ണാടകത്തിലെയും ആന്ധ്രയിലെയും രാഷ്ട്രീയരംഗത്തെ പ്രമുഖര്‍ വിവാഹത്തില്‍ പങ്കെടുത്തിരുന്നു. എട്ട്‌ ഏക്കര്‍സ്ഥലത്താണ്‌ കല്യാണമണ്ഡപം ഉള്‍പ്പെടുന്ന പന്തല്‍ പണിഞ്ഞത്‌.

ഇതില്‍ത്തന്നെ വിഐപികള്‍ക്കും വിവിഐപികള്‍ക്കും പ്രത്യേകം ഹാളുകള്‍ ഒരുക്കിയിരുന്നുവത്രേ. പന്തലില്‍ മൊത്തം 500 എയര്‍കണ്ടീഷണറുകളാണത്രേ ഉപയോഗിച്ചിരുന്നത്‌. ഒരു സാധാരണകുടുംബത്തില്‍ നിന്നുള്ള ദീപയെന്ന പെണ്‍കുട്ടിയെയാണ്‌ സുരേഷ്‌ കുമാര്‍ വിവാഹം ചെയ്‌തിരിക്കുന്നത്‌.

കോണ്ടിനന്റല്‍ ഉള്‍പ്പെടെ വ്യത്യസ്‌ത തരത്തിലുള്ള ഭക്ഷണങ്ങള്‍ തയ്യാറാക്കാനായി 200 പ്രമുഖ പാചകക്കാരെയാണത്രേ നിയോഗിച്ചിരുന്നത്‌. അതിഥികള്‍ക്കായി പ്രമുഖ ഹോട്ടലുകളിലാണ്‌ മുറി ബുക്കുചെയ്‌തിരുന്നത്‌.

എല്ലാംകൂടി കല്യാണത്തിന്‌ 20കോടി രൂപ ചെലവായെന്നാണ്‌ കണക്കുകള്‍ സൂചിപ്പിക്കുന്നത്‌. എന്തായാലും ഇതിന്റെ പേരില്‍ ശ്രീരാമലു വെള്ളംകുടിച്ചു തുടങ്ങിയെന്നാണ്‌ കേള്‍ക്കുന്നത്‌.