ഇന്ത്യന് വിദ്യാര്ഥികള് അതിഥികള്: കെവിന്
സിഡ്നി: ഇന്ത്യക്കാരായ വിദ്യാര്ത്ഥികളെ ആക്രമിച്ചവരെ നിയമത്തിന് മുന്നിലെത്തിക്കാന് ആസ്ത്രേലിയന് സര്ക്കാര് അടിയന്തര നടപടി സ്വീകരിക്കുമെന്ന് പ്രധാനമന്ത്രി കെവിന് റൂഡ് പാര്ലമെന്റില് പറഞ്ഞു.
ആക്രമണത്തിന്റെയും തുടര്ന്നുണ്ടായ പ്രശ്നങ്ങളുടെയും പശ്ചാത്തലത്തില് ഇന്ത്യയിലെ പ്രധാനമന്ത്രി മന്മോഹന് സിങുമായി ഫോണില് ബന്ധപ്പെട്ടിരുന്നുവെന്നും അദ്ദേഹം വ്യക്തമാക്കി. ആക്രമണങ്ങളെ അപലപിക്കുന്നതായും അദ്ദേഹം അറിയിച്ചു.
ആസ്ത്രേലിയയിലുള്ള 90,000 ഇന്ത്യന് വിദ്യാര്ത്ഥികള് രാജ്യത്തിന്റെ അതിഥികളാണ്. അവര്ക്ക് നേര്ക്കുണ്ടായ ആക്രമണങ്ങള് പരിപാതപകരമാണ്. അന്യരാജ്യങ്ങളില് നിന്നുള്ള വിദ്യാര്ത്ഥികളുടെ സുരക്ഷയ്ക്ക് സര്ക്കാര് മതിയായ നടപടികള് സ്വീകരിക്കും- കെവിന് പറഞ്ഞു.
ഇന്ത്യക്കാര്ക്കെതിരെയുണ്ടായ ആക്രമണങ്ങള് തികച്ചും ആസ്ത്രേലിയാ വിരുദ്ധമാണെന്ന് പ്രതിപക്ഷ നേതാവ് മാല്കം ടേണ്ബുള് പറഞ്ഞു. അന്യരാജ്യ വിദ്യാര്ത്ഥികള് അതിഥികളാണ്. ആക്രമണങ്ങളുടെ പശ്ചാത്തലത്തില് മറ്റു രാജ്യങ്ങളില് നിന്നുള്ള വിദ്യാര്ത്ഥികള് ആസ്ത്രേലിയയില് വരാന് മടിക്കുമെന്നും അദ്ദേഹം അഭിപ്രായപ്പെട്ടു.
ഇന്ത്യയില് നിന്നുള്ള വിദ്യാര്ത്ഥികള്ക്ക് നേര്ക്കുള്ള ആക്രമണങ്ങളില് ഇന്ത്യന് അധികൃതര് ഒരു വര്ഷം മുമ്പേ ഉത്കണ്ഠ രേഖപ്പെടുത്തിയിട്ടുള്ളത് വാണിജ്യമന്ത്രി സിമോണ് കീന് ചൂണ്ടിക്കാട്ടി. ഇതുസംബന്ധിച്ച പരാതികള് ഗൗരവത്തോടെ കാണണമെന്നും അദ്ദേഹം ആവശ്യപ്പെട്ടു.