അഭിപ്രായഭിന്നത യോജിപ്പിന് തടസ്സമാകും: പിണറായി
കണ്ണൂര്: മുന്നണിയിലുള്ള അഭിപ്രായവ്യത്യാസങ്ങള് തുടരുകയാണെങ്കില് അത് യോജിപ്പിന് തടസ്സമാകുമെന്ന് സിപിഎം സംസ്ഥാന സെക്രട്ടറി പിണറായി വിജയന്.
മുന്നണിയില് പൊതു തിരുത്തലിന് തയ്യാറാവണം. പരാജയം പാഠമായി എടുക്കണം. വാക്കിന് വാക്ക് എന്ന രീതിയില് പറയാന് എല്ലാവര്ക്കും കഴിയും. അനാവശ്യമായ വാക്കുകള് ഉപയോഗിക്കുമ്പോള് എല്ലാവരും ശ്രദ്ധിക്കണം- അദ്ദേഹം പറഞ്ഞു.
കഴിഞ്ഞ ദിവസം സിപിഎമ്മിനെതിരെ വിമര്ശനം ഉയര്ത്തിവിട്ട സിപിഐ സംസ്ഥാന സെക്രട്ടറി വെളിയം ഭാര്ഗവനെ പേരെടുത്തു പറയാതെ പരോക്ഷമായിട്ടായിരുന്നു പിണറായിയുടെ പരാമര്ശം.
ഇടത് മുന്നണിയില് തിരഞ്ഞെടുപ്പിന് മുമ്പ് നടന്ന കാര്യങ്ങള് ജനങ്ങള്ക്കിഷ്ടപ്പെട്ടില്ല എന്നകാര്യം ശരിയാണ്. മാര്ച്ച് മൂന്നുമുതല് 19വരെയുള്ള ദിനങ്ങളില് മുന്നണിയില് യോജിപ്പിന്റേതല്ലാത്ത പ്രശ്നങ്ങളുണ്ടായി. വലിയ തോതിലുള്ള വാഗ്വാദങ്ങളും പരസ്യമായ അവകാശം പറച്ചിലുകളുമുണ്ടായി.
ഇടത് മുന്നണി എന്ന നിലയ്ക്ക് സംഭവിച്ച പോരായ്മയായിരുന്നു അത്. യോജിച്ച് നില്ക്കേണ്ടതിന് പകരം പരസ്യമായ അഭിപ്രായഭിന്നത പുറത്തുവന്നു. ഇത് ജനങ്ങള്ക്കിഷ്ടമായില്ല- പിണറായി ചൂണ്ടിക്കാട്ടി.
തിരഞ്ഞെടുപ്പിലെ പരാജകാരണങ്ങള് ഗൗരവമായി എടുത്തിട്ടുണ്ട്. തിരുത്തേണ്ടകാര്യങ്ങള് തിരുത്തിക്കൊണ്ടുതന്നെ മുന്നോട്ടുപോകും. ന്യൂനപക്ഷങ്ങളുമായുള്ള ബന്ധത്തില് മുന്നണി തലത്തിലോ സര്ക്കാര്തലത്തിലോ വീഴ്ചസംഭവിച്ചിട്ടുണ്ടെങ്കില് തിരുത്താന് മടിയില്ല- അദ്ദേഹം വ്യക്തമാക്കി.
കണ്ണൂരില് ചൊവ്വാഴ്ച രക്തസാക്ഷികളുടെ കുടുംബങ്ങള്ക്കുള്ള പാര്ട്ടിഫണ്ട് വിതരണം ചെയ്ത് സംസാരിക്കുകയായിരുന്നു അദ്ദേഹം.