റിലയന്‍സിന്റെ ജര്‍മ്മന്‍ യൂണിറ്റ്‌ പാപ്പരായി

മുംബൈ: ആഗോള സാമ്പത്തിക മാന്ദ്യം രാജ്യത്തെ വന്‍കിട കമ്പനികളിലൊന്നായ റിലയന്‍സ്‌ ഇന്‍ഡസ്‌ട്രീസിനെയും ബാധിക്കുന്നു. കമ്പനിയുടെ ജര്‍മ്മനിയിലുള്ള പോളിസ്‌റ്റര്‍ യൂണിറ്റായ ട്രവിറയെ പാപ്പരായി പ്രഖ്യാപിച്ചതോടെയാണ്‌ മാന്ദ്യം റിലയന്‍സിനെ എത്രത്തോളം ആഴത്തില്‍ ബാധിച്ചുവെന്ന കാര്യം വെളിപ്പെട്ടിരിയ്ക്കുന്നത്.

അഞ്ചു വര്‍ഷം മുമ്പ്‌ 440 കോടി രൂപയ്‌ക്കാണ്‌ റിലയന്‍സ്‌ ഇന്‍ഡസ്‌ട്രീസ്‌ ട്രിവിറ ഏറ്റെടുത്തത്‌. ഈ ഏറ്റെടുക്കലോടെ ലോകത്തെ ഏറ്റവും വലിയ പോളിസ്‌റ്റര്‍ നിര്‍മാതാക്കളായി റിലയന്‍സ്‌ മാറിയിരുന്നു. കഴിഞ്ഞ വര്‍ഷം മാത്രം 32.3 കോടി യൂറോയുടെ വ്യാപാരമാണ്‌ ട്രിവിറ നടത്തിയത്‌.

ടെക്‌സ്റ്റൈല്‍, ഓട്ടോമൊബൈല്‍ രംഗങ്ങളില്‍ യൂറോപ്പിലുണ്ടായ അനുഭവപ്പെട്ട മാന്ദ്യമാണ്‌ ട്രിവിറയ്‌ക്കും തിരിച്ചടിയായത്‌. പാപ്പര്‍ നടപടികളിലൂടെ കമ്പനി നിലനിര്‍ത്താനുള്ള ശ്രമങ്ങളാണ്‌ നടത്തുന്നതെന്ന്‌ റിലയന്‍സ്‌ മുംബൈയില്‍ ഇറക്കിയ പത്രക്കുറിപ്പില്‍ പറയുന്നു.

രാജ്യാന്തര ഏറ്റെടുക്കലുകള്‍ മൂലം സാമ്പത്തിക പ്രതിസന്ധിയില്‍ അകപ്പെടുന്ന ഏറ്റവും ഒടുവിലത്തെ ഇന്ത്യന്‍ കമ്പനിയാണ്‌ റിലയന്‍സ്‌ ഇന്‍ഡസ്‌ട്രീസ്‌. ആഡംബര കാറുകളായ ജാഗ്വറും മറ്റും ഏറ്റെടുത്ത്‌ ടാറ്റയും സമാനമായ പ്രതിസന്ധി നേരിടുകയാണെന്ന്‌ റിപ്പോര്‍ട്ടുകള്‍ പുറത്തുവന്നിരുന്നു.