ജനപിന്തുണ അച്ചടക്ക നടപടിക്ക്‌ തടസ്സമല്ല

തിരുവനന്തപുരം: സിപിഎം നേതാക്കള്‍ അച്ചടക്ക ലംഘനം നടത്തിയാല്‍ നടപടിയെടുക്കാന്‍ ജനപിന്തുണ പ്രശ്‌നമല്ലെന്ന്‌ സംസ്ഥാന സെക്രട്ടേറിയറ്റ്‌ അംഗവും മുന്‍ മന്ത്രിയുമായിരുന്ന ടി ശിവദാസമേനോന്‍. മുമ്പും ഇത്തരം നടപടികള്‍ ഉണ്ടായിട്ടുണ്ട്‌. പാര്‍ട്ടിയിലെ എത്ര ഉന്നതനായാലും നടപടി ഉണ്ടാകും.

ഭരണഘടനാപദവിയിലിരിക്കുന്ന മുഖ്യമന്ത്രി ഗവര്‍ണറുമായി തര്‍ക്കിക്കരുത്‌. ഇത്‌ ഭരണഘടനാപരമായി നല്ലതല്ല. അതിനാല്‍ ഏറ്റുമുട്ടല്‍ ഒഴിവാക്കാനായിരിക്കും വിഎസ്‌ അങ്ങനെ സംസാരിച്ചത്‌.

പാര്‍ട്ടിയിലെ പ്രവര്‍ത്തനമാണ്‌‌ നേതാക്കള്‍ക്കു ജനപിന്തുണ ലഭിക്കുന്നത്‌. ഇത്‌ പക്ഷേ അച്ചടക്ക ലംഘനത്തിനു നടപടി എടുക്കുന്നതില്‍ തടസമല്ല. നേതാക്കളുടെ ജനപിന്തുണ പാര്‍ട്ടിക്കു നേട്ടമാണ്‌. എന്നാല്‍ ജനപിന്തുണയുള്ള ഒരു നേതാവ്‌ പുറത്തു പോയെന്നു കരുതി പാര്‍ട്ടിക്ക്‌ ചുക്കും സംഭവിക്കില്ല. പാര്‍ട്ടിയിലെ ശക്തരായിരുന്ന എംവി രാഘവന്റെയും ഗൗരിയമ്മയുടെയും പുറത്താക്കല്‍ അദ്ദേഹം ചൂണ്ടിക്കാണിച്ചുയ

പോളിറ്റ്‌ ബ്യൂറോ അംഗമായ മുഖ്യമന്ത്രിയുടെ ശരിയും തെറ്റും പിബി തന്നെ പരിശോധിക്കും. അദ്ദേഹം അച്ചടക്കം ലംഘനം നടത്തിയോ എന്ന്‌ പിബി തീരുമാനിക്കും. ഇക്കാര്യത്തില്‍ പിബി സംസ്‌ഥാന സെക്രട്ടേറിയറ്റിന്റെ അഭിപ്രായം തേടിയാല്‍ അറിയിക്കുമെന്നും അദ്ദേഹം വ്യക്തമാക്കി.

ലാവലിന്‍ കേസില്‍ പിണറായി വിജയനെ പ്രോസിക്യൂഷന്‍ ചെയ്യാന്‍ അനുമതി നല്‌കിയ ഗവര്‍ണറുടെ നടപടിയെ വിഎസ്‌ ന്യായീകരിച്ചിരുന്നു.