നിസംഗത പുലര്‍ത്തുന്നവര്‍ പാര്‍ട്ടിയുടെ ശത്രുക്കള്‍

തിരുവനന്തപുരം: സിപിഎമ്മിനെ തകര്‍ക്കാന്‍ ശ്രമം നടക്കുമ്പോള്‍ നിസ്സംഗത പുലര്‍ത്തുന്നവര്‍ യഥാര്‍ത്ഥത്തില്‍ പാര്‍ട്ടിയുടെ ശത്രുക്കളാണെന്നും ശത്രുക്കള്‍ക്ക്‌ മാത്രമേ അങ്ങനെ നോക്കിനില്‍ക്കാന്‍ കഴിയുകയുള്ളൂവെന്നും എല്‍ഡിഎഫ്‌ കണ്‍വീനര്‍ വൈക്കം വിശ്വന്‍.

പാര്‍ട്ടിയുടെ സംരക്ഷകരാണെന്ന്‌ ചിലര്‍ പറഞ്ഞു നടക്കുന്നുണ്ട്‌. പാര്‍ട്ടിയ്‌ക്കകത്തുനിന്നായാലും പുറത്തുനിന്നായാലും ഇവര്‍ സിപിഎമ്മിനെ തകര്‍ക്കുകയാണ്‌ ചെയ്യുന്നത്‌. വൈക്കം വിശ്വന്റെ പരാമര്‍ശങ്ങള്‍ വിഎസിനെതിരെയുള്ള ഒളിയന്പുകളായാണ് വിലയിരുത്തപ്പെടുന്നത്. നിസംഗത പുലര്‍ത്തുന്നവര്‍ എന്ന പരാമര്‍ശത്തിലൂടെ വിശ്വന്‍ ലക്ഷ്യമിടുന്നത് വിഎസിനെ തന്നെയാണ്.

ലാവലിന്‍ കേസില്‍ ഗവര്‍ണര്‍ പ്രലോഭനത്തിന്‌ വഴങ്ങിയാണ്‌ പ്രോസിക്യൂഷന്‍ അനുമതി നല്കിയതെന്നും അദ്ദേഹം ആരോപിച്ചു. ഗവര്‍ണര്‍ തെറ്റുതിരുത്താന്‍ തയ്യാറാകണം അല്ലെങ്കില്‍ പുറത്തു പോകണമെന്നും സിപിഎം സംസ്ഥാന സെക്രട്ടേറിയറ്റ്‌ അംഗം കൂടിയായ വൈക്കം വിശ്വന്‍ പറഞ്ഞു.

ഗവര്‍ണറുടെ നടപടിയില്‍ പ്രതിഷേധിച്ച്‌ തിരുവനന്തപുരത്ത്‌ രാജ്‌ഭവന്‌ മുന്നില്‍ ധര്‍ണ ഉദ്‌ഘാടനം ചെയ്യുകയായിരുന്നു അദ്ദേഹം.

ഗവര്‍ണര്‍ നിയമപരമായ സമീപനമല്ല എടുത്തത്‌. കേസിലെ രാഷ്‌ട്രീയ സാഹചര്യങ്ങള്‍ വിശദീകരിക്കുന്നതിനാണ്‌ രാഷ്‌ട്രീയപരമായി നേരിടുമെന്ന്‌ പാര്‍ട്ടി പറഞ്ഞത്‌. പിണറായി പ്രതിയല്ല എന്നത്‌ ഉമ്മന്‍ചാണ്ടി മുഖ്യമന്ത്രിയായിരുന്ന കാലത്ത്‌ തെളിഞ്ഞതാണെന്നും അദ്ദേഹം ചൂണ്ടിക്കാട്ടി.