മരണം വിടാതെ പിന്നാലെ!
ലണ്ടന്: വിമാനപകടത്തില് നിന്നും തലനാരിഴയ്ക്ക് ഒഴിവായ സ്ത്രീ കാറപകടത്തില് കൊല്ലപ്പെട്ടു. 228 യാത്രക്കാരുമായി ജൂണ് ഒന്നിന് അറ്റ്ലാന്റിക് സമുദ്രത്തില് തകര്ന്നു വീണ എയര് ഫ്രാന്സ് വിമാനത്തില് യാത്ര ചെയ്യേണ്ടിയിരുന്ന ജൊഹാന ഗ്യാന്തലര് എന്ന സ്ത്രീയെയാണ് മരണം വിടാതെ പിന്തുടര്ന്ന് കീഴടക്കിയത്.
ഭര്ത്താവുമൊത്ത് ബ്രസിലീല് അവധിക്കാലം ചെലവഴിക്കാനെത്തിയ ജൊഹാന ജൂണ് ഒന്നിനാണ് സ്വദേശമായ ഫ്രാന്സിലേക്ക് മടങ്ങാന് തീരുമാനിച്ചിരുന്നത്. മടക്കയാത്രയ്ക്ക് റിയോഡിജനീറോ വിമാന താവളത്തില് എത്താന് ഇവര് വൈകി. അപ്പോഴേക്കും എയര്ഫ്രാന്സ് വിമാനം അതിന്െ അവസാന യാത്ര പുറപ്പെട്ടിരുന്നു.
തുടര്ന്ന് അടുത്ത ദിവസം മറ്റൊരു വിമാനത്തില് ഇവര് ഫ്രാന്സിലെത്തി ചേര്ന്നു. ഒരു ദുരന്തത്തില് നിന്ന് രക്ഷപ്പെട്ടതിന്റെ ആശ്വാസത്തിലിരിയ്ക്കെയാണ് വിധി കാറപകടത്തിന്റെ രൂപത്തില് ജൊഹാനയുടെ ജീവന് കവര്ന്നത്.
ഭര്ത്താവുമൊത്ത് കാറില് പോകവെ നിയന്ത്രണം വിട്ട കാര് ട്രക്കിലിടിച്ചാണ് അപകടമുണ്ടായത്. ജൊഹാനയുടെ ഭര്ത്താവിനെ ഗുരതരമായ നിലയില് ആശുപത്രിയില് പ്രവേശിപ്പിച്ചിരിയ്ക്കുകയാണ്.