പ്രഭാകരന് തിരഞ്ഞെടുപ്പ് ഫലം കാത്തിരുന്നു
ദില്ലി: എല്ടിടിഇ നേതാവ് വേലുപ്പിള്ള പ്രഭാകരന് കൊല്ലപ്പെടുന്നതിന് മുമ്പ് പുതിയ നീക്കങ്ങള്ക്കായി ഇന്ത്യന് തിരഞ്ഞെടുപ്പ് ഫലം ഉറ്റുനോക്കിയിരുന്നതായി റിപ്പോര്ട്ട്. തിരഞ്ഞെടുപ്പില് മൂന്നാം മുന്നണിയോ എന്ഡിഎയോ അധികാരത്തിലെത്തുമെന്നായിരുന്നു പ്രഭാകരന്റെ പ്രതീക്ഷിച്ചിരുന്നതെന്ന് ലങ്കന് സേന വക്താക്കള് വെളിപ്പെടുത്തി.
ഇന്ത്യന് തിരഞ്ഞെടുപ്പ് ഫലം പുറത്തുവരുന്ന മെയ് 16ന് ശേഷം അടുത്ത നീക്കം നടത്താനായിരുന്നു പ്രഭാകരന്റെ പദ്ധതി. അധികാരത്തിലെത്തുന്ന സര്ക്കാര് ലങ്കയിലെ ആഭ്യന്തര പ്രശ്നങ്ങളില് ഇടപെടുമെന്നും പ്രഭാകരന് പ്രതീക്ഷിച്ചു. എന്നാല് എല്ടിടിഇയെ വേരോടെ പിഴുതെറിയാനുള്ള ലങ്കന് സേനയുടെ ശ്രമങ്ങള് അപ്പോഴേക്കും വളരെയേറെ മുന്നേറിയിരുന്നു. പുലികള്ക്ക് രക്ഷപ്പെടാനുള്ള എല്ലാവഴികളും സേന അടച്ചിരുന്നു.
മേയ് 16ന് ഉച്ചയ്ക്കു ശേഷം വെടിനിര്ത്തല് മേഖലയില് ഉണ്ടായിരുന്ന എല്ലാവരെയും സുരക്ഷിത മേഖലയിലേക്കു നീങ്ങാന് എല്ടിടിഇ അനുവാദം നല്കിയത്. ഇന്ത്യയില് തിരഞ്ഞെടുപ്പ് ഫലം ഏകദേശ രൂപം ഉച്ചയോടെ പുറത്തു വന്ന ശേഷമായിരുന്നു ഇതെന്നും റിപ്പോര്ട്ടില് പറയുന്നു.