മുല്ലപ്പെരിയാര് അപകടത്തില്: കേന്ദ്രം ഇടപെടണം
തിരുവനന്തപുരം : മുല്ലപ്പെരിയാര് പ്രശ്നത്തില് കേന്ദ്രസര്ക്കാര് അടിയന്തിരമായി ഇടപെടണമെന്ന് ജലവിഭവമന്ത്രി എന്കെ പ്രേമചന്ദ്രന് പറഞ്ഞു. മുല്ലപ്പെരിയാര് ഡാം അപകടവസ്ഥയിലാണെന്ന് വിദഗ്ധ സമിതി റിപ്പോര്ട്ട് നല്കിയതായി മന്ത്രി അറിയിച്ചു.
ഡാമിന്റെ ബലക്ഷയം മുമ്പത്തേക്കാളും അധികമാണ്. ശാശ്വതപരിഹാരമായി പുതിയ ഡാം നിര്മിക്കണമെന്നാണ് പരമേശ്വരന് നായര് കണ്വീനറായ സമിതി നല്കിയ റിപ്പോര്ട്ടിലുള്ളത്. തിരുവനന്തപുരത്ത് വാര്ത്താ സമ്മേളനത്തില് സംസാരിക്കുകയായിരുന്നു മന്ത്രി.
ഇക്കാര്യം ചൂണ്ടിക്കാട്ടി മുഖ്യമന്ത്രി വിഎസ് അച്യുതാനന്ദന് പ്രധാനമന്ത്രി മന്മോഹന്സിങ്ങിനും എം കരുണാനിധിക്കും കത്ത് അയയ്ക്കും. പ്രശ്നത്തോടുള്ള തമിഴ്നാട് സര്ക്കാരിന്റെ നിലപാട് നിര്ഭാഗ്യകരമാണെന്നും മന്ത്രി പറഞ്ഞു.
തമിഴ്നാട് സര്ക്കാര് പ്രശ്നത്തെ ഗൗരവത്തോടെ കാണുന്നില്ലെന്ന് അദ്ദേഹം കുറ്റപ്പെടുത്തി. ജുഡീഷ്യല് പരിഹാരത്തിന് തമിഴ്നാട് തയാറാവണം. തീരുമാനം വരുന്നതിനു മുമ്പ് എന്തെങ്കിലും അത്യാഹിതം സംഭവിക്കുമോ എന്ന് താന് ഭയക്കുന്നതായും അദ്ദേഹം പറഞ്ഞു.