ബോളിവുഡ് താരം ഷൈനി കുറ്റം സമ്മതിച്ചു
മുംബൈ: വീട്ടുജോലിക്കാരിയെ മാനഭംഗപ്പെടുത്തിയ കേസില് ബോളിവുഡ് താരം ഷൈനി അഹൂജ കുറ്റം സമ്മതിച്ചു.
ജോലിക്കാരിയുടെ സമ്മതത്തോടെയാണ് അവരുമായി ബന്ധപ്പെട്ടതെന്നാണ് ഷൈനി പോലീസിനോട് പറഞ്ഞിരുന്നത്. എന്നാല് പീഡിപ്പിക്കാന് ശ്രമിച്ചപ്പോള് ചെറുത്തുനിന്ന പെണ്കുട്ടിയെ അഹൂജ മര്ദിച്ചതായി പൊലീസ് വെളിപ്പെടുത്തി. പെണ്കുട്ടി മൃഗീയമായ പീഡനത്തിന് ഇരയാകുകയായിരുന്നെന്നും ഡെപ്യൂട്ടി പൊലീസ് കമ്മിഷ്ണര് നികേത് കൗശിക് അറിയിച്ചു.
താന് ക്രൂരമായി ശാരീരിക പീഡനത്തിന് വിധേയമായെന്ന് പെണ്കുട്ടി ഓഷിവാര പോലീസിന് നല്കിയ പരാതിയിലുണ്ടായിരുന്നു. അതിനിടെ നാഗ്പഡ പോലീസ് ആസ്പത്രിയില് നടത്തിയ വൈദ്യ പരിശോധനയില് പെണ്കുട്ടി ശാരീരിക പീഡനത്തിന് ഇരയായതായി സ്ഥിരീകരിച്ചു.
കൗമാരക്കാരിയായ പെണ്കുട്ടിയുടെ സ്വകാര്യ ഭാഗങ്ങളില് മുറിവേറ്റതായും മെഡിക്കല് റിപ്പോര്ട്ടില് പറയുന്നു. താരത്തെ ജൂണ് 18 വരെ റിമാന്ഡ് ചെയ്തിട്ടുണ്ട്. വന് സ്വാധീനശക്തിയുള്ള അഹൂജ ജാമ്യത്തിലിറങ്ങിയാല് കേസ് അട്ടിമറിയ്ക്കാന് സാധ്യതയുണ്ടെന്ന് വാദി ഭാഗം അഭിഭാഷകര് കോടതിയില് ബോധിപ്പിച്ചു.
ഗ്യാങ്സ്റ്റര്, വോലംഹെ, ലൈഫ് ഇന് മെട്രോ കേരളത്തിന്റെ പശ്ചാത്തലത്തില് ചിത്രീകരിച്ച വിവാദ ചിത്രമായ സിന് എന്നീ സിനിമകളിലൂടെയാണ് ഷൈനി ബോളിവുഡില് മുന്നിരയിലെത്തിയത്.