വിഎസിനെ പുറത്താകണം: തോമസ് ഐസക്ക്
ദില്ലി: പോളിറ്റ് ബ്യൂറോ യോഗത്തിന്റെ തുടര്ച്ചയായി ചേരുന്ന സിപിഎം കേന്ദ്ര കമ്മിറ്റി യോഗത്തില് വിഎസ് അച്യുതാനന്ദനെതിരെ ഔദ്യോഗികപക്ഷത്തിന്റെ രൂക്ഷ വിമര്ശനം. വിഎസ് അച്യുതാന്ദനെ മുഖ്യമന്ത്രി സ്ഥാനത്തുനിന്നും പാര്ട്ടി സ്ഥാനത്തുനിന്നും നീക്കണമെന്ന് ധനമന്ത്രി തോമസ് ഐസക് ആവശ്യപ്പെട്ടു. സംസ്ഥാന സമിതി യോഗങ്ങളിലും സെക്രട്ടേറിയറ്റിലും നടന്ന വിമര്ശനങ്ങളുടെ തുടര്ച്ചയെന്നോണമാണ് ഓദ്യോഗികപക്ഷം വിഎസിനെ നേരിട്ടത്.
സംസ്ഥാന സെക്രട്ടറി പിണറായി വിജയനെ പൊതുജനമധ്യത്തില് തേജോവധം ചെയ്യുന്നതരത്തിലുളള നടപടികള് വിഎസ് അച്യുതാന്ദന്റെ ഭാഗത്തുനിന്ന് ഉണ്ടായെന്ന് ഐസക് ആരോപിച്ചു.
തിരഞ്ഞെടുപ്പ് പരാജയകാരണങ്ങള് ചൂണ്ടിക്കാട്ടി സംസ്ഥാന സമിതി അംഗീകരിച്ച റിപ്പോര്ട്ട് ചൂണ്ടിക്കാണിച്ചായിരുന്നു ഐസക്കിന്റെ വിമര്ശനം. വിഎസിനെ പാര്ട്ടിയ്ക്കകത്ത് പോലും നിലനിര്ത്തുന്നത് പോലും വലിയ ദോഷം ചെയ്യുമെന്ന് ഐസക്ക് തുറന്നടിച്ചു. മുഖ്യമന്ത്രിയുടെ പ്രവര്ത്തനശൈലി തെരഞ്ഞെടുപ്പില് പരാജയത്തിന് കാണമായെന്നും ഐസക്ക് ആരോപിച്ചു.
ജനറല് സെക്രട്ടറി പ്രകാശ് കാരാട്ട് തിരഞ്ഞെടുപ്പ് അവലോകനത്തിന്റെ കരട് റിപ്പോര്ട്ട് അവതരണത്തോടെയാണ് കേന്ദ്ര കമ്മിറ്റി യോഗം ആരംഭിച്ചത്. ചില നേതാക്കളുടെ ജീവിത ശൈലി കമ്യൂണിസ്റ്റ് രീതിയില് നിന്ന് വ്യതിചലിച്ചുവെന്നും, വി എസ് തിരഞ്ഞെടുപ്പ് പ്രവര്ത്തനങ്ങളില് കൂടുതല് സജീവമാകേണ്ടിരുന്നുവെന്നും റിപ്പോര്ട്ടില് പറയുന്നുണ്ട്.