സിനിമാസ്റ്റൈല് തട്ടിപ്പ്:സ്ലംഡോഗ് താരം പിടിയില്
മുംബൈ: സിനിമയിലെ ഗുണ്ടാ റോള് ജീവിതത്തിലും പകര്ത്തിയ സ്ലംഡോഗ് മില്യനെയര് താരത്തെ പോലീസ് അറസ്റ്റു ചെയ്തു. മുംബൈ സ്വദേശി അജിത് പാണ്ഡെ(20)യാണ് സിനിമാ സ്റ്റൈല് തട്ടിപ്പിനിടെ പിടിയിലായത്. പ്രമോദ് കപൂര് എന്ന സിനിമാ നിര്മ്മാതാവിനെ ഭീഷണിപ്പെടുത്തി പണം തട്ടാന് ശ്രമിക്കുന്നതിനിടെയാണ് പാണ്ഡെ പിടിയിലായത്.
അധോലോക നായകന് ഛോട്ടാ ഷക്കീലിന്റെ അനുയായിയെന്ന് സ്വയം പരിചയപ്പെടുത്തിയ പാണ്ഡെ, താന് കുറ്റകൃത്യങ്ങള് അവസാനിപ്പിക്കാന് പോകുന്നതായും, സിനിമകളില് നല്ല റോളുകള് തരണമെന്നും, ആവശ്യപ്പെട്ടു. അതിന് കഴിഞ്ഞില്ലെങ്കില് 20 ലക്ഷം തരണമെന്ന് പാണ്ഡെ ഭീഷണിപ്പെടുത്തി. എന്നാല് കപൂര് ഇതിന് വഴങ്ങിയില്ല. ഭീഷണി തുടര്ന്നപ്പോള് കപൂര് പോലീസില് പരാതി നല്കുകയായിരുന്നു.
പോലീസിനെ വഴി തെറ്റിയ്ക്കുന്നതിനായി മദ്ധ്യപ്രദേശില് നിന്നുള്ള സിംകാര്ഡാണ് പാണ്ഡെ ഉപയോഗിച്ചിരുന്നത്. ഇതിനിടെ പോലീസ് സംശയിക്കാതിരിക്കുന്നതിനായി കപൂറിന്റെ സിനിമകളില് അഭിനയിക്കണമെന്ന് ഷക്കീല് തന്നെ ഭീഷണിപ്പെടുത്തിയതായി കാണിച്ച് പാണ്ഡെ കനാകിയ പൊലീസ് സ്റ്റേഷനില് പരാതി നല്കുകയും ചെയ്തിരുന്നു.
സ്ലംഡോഗില് ഒരു ഗുണ്ടാതലവന്റെ അനുയായി ആയിട്ടായിരുന്നു പാണ്ഡെ അഭിനയിച്ചത്. ഇയാളെ ജൂണ് 27വരെ പൊലീസ് കസ്റ്റഡിയില് റിമാന്റ് ചെയ്തു.