ദള് വീരന് വിഭാഗം വിപ്പ് ലംഘിച്ചു
തിരുവനന്തപുരം: നിയമസഭയില് ധനാഭ്യര്ത്ഥനയുടെ വോട്ടെടുപ്പില് നിന്ന് ജനതാദളിലെ വീരന് വിഭാഗം വിട്ടുനിന്നു. പാര്ട്ടി ദേശീയ പ്രസിഡന്റ് എച്ച്ഡി ദേവഗൗഡ നല്കിയ വിപ്പ് ലംഘിച്ചാണ് എംകെ പ്രേമനാഥ്, കെപി മോഹനന്, എംവി ശ്രേയാംസ്കുമാര് എന്നിവര് വോട്ടെടുപ്പ് സമയത്ത് സഭയില് ഹാജരാതിരുന്നത്.
എല്ഡിഎഫിനൊപ്പം ഉറച്ചു നിലക്കുന്ന മാത്യു ടി തോമസും ജോസ് തെറ്റയിലും സര്ക്കാരിന് അനുകൂലമായി വോട്ട ചെയ്തു. എല്ലാ വോട്ടെടുപ്പിലും സര്ക്കാരിനെ പിന്തുണയ്ക്കണമെന്നും വോട്ടെടുപ്പില് നിന്ന് വിട്ടുനില്ക്കാന് പാടില്ലെന്നുമായിരുന്നു ഗൗഡയുടെ നിര്ദ്ദേശം.
എന്നാല് ദേവഗൗഡയുടെ തീരുമാനം തെറ്റായത് കൊണ്ടാണ് ധനാഭ്യര്ത്ഥന ചര്ച്ചയുടെ വോട്ടിംഗില് നിന്ന് വിട്ടുനിന്നതെന്ന് ജനതാദള് എസ് ചീഫ് വിപ്പ് എംകെ പ്രേംനാഥ് പറഞ്ഞു.
തന്റെ നിര്ദേശം അവഗണിച്ചാണ് പാര്ട്ടിയിലെ രണ്ട് എംഎല്എമാര് ഭരണപക്ഷത്തിന് അനുകൂലമായി വോട്ട് ചെയ്തതെന്നും അദ്ദേഹം ചൂണ്ടിക്കാട്ടി. സഭയില് ആര്ക്ക് വോട്ട് ചെയ്യണമെന്ന് തീരുമാനിക്കുന്നത് പാര്ട്ടിയുടെ ചീഫ് വിപ്പാണ്. ഇതിലുള്ള പ്രതിഷേധം ദേവഗൗഡയെ അറിയിക്കുമെന്നും പ്രേംനാഥ് പറഞ്ഞു.
വോട്ടെടുപ്പില് നിന്ന് വിട്ടുനിന്ന മൂന്ന് എംഎല്മാരും രാവിലെ സഭയില് ഉണ്ടായിരുന്നെങ്കിലും ഉച്ചയ്ക്ക് ശേഷം ഇവര് സഭയില് നിന്നും അപ്രത്യക്ഷരാവുകയായിരുന്നു. വോട്ടെടുപ്പ് ഉണ്ടാവുമെന്ന് അറിഞ്ഞു കൊണ്ട് തന്നെയാണ് ഇവര് മാറിനിന്നതെന്നാണ് സൂചന.