സിപിഎം ആസ്ഥാനത്തേക്ക് മാവോയിസ്റ്റ് മാര്ച്ച്
ദില്ലി: സിപിഎം ആസ്ഥാനമായ ദില്ലിയിലെ എകെജി ഭവനിലേക്ക് മാവോയിസ്റ്റ് അനുകൂലികള് നടത്തിയ പ്രകടനത്തില് നേരിയ സംഘര്ഷം.
പശ്ചിമബംഗാളില് മാവോയിസ്റ്റുകള് നിയന്ത്രണത്തിലാക്കിയ ആദിവാസി ഭൂരിപക്ഷ മേഖലയായ ലാല്ഗഡിലെ സൈനിക നടപടി അവസാനിപ്പിക്കണമെന്ന് ആവശ്യപ്പെട്ടായിരുന്നു മാര്ച്ച്.
തിങ്കളാഴ്ച രാത്രിയാണ് എകെജി ഭവനിലേക്ക് മാര്ച്ച് നടത്തുമെന്ന സന്ദേശം മാധ്യമങ്ങള്ക്കും പോലീസിനും ലഭിച്ചത്. ഇതേ തുടര്ന്ന് പോലീസ് കനത്ത സുരക്ഷാക്രമീകരണങ്ങളാണ് ഒരുക്കിയിരുന്നതെങ്കിലും പ്രതിഷേധക്കാരെ തടയാന് കഴിഞ്ഞില്ല.
രാവിലെ മുതല് ചെറു സംഘങ്ങളായി എത്തിയ സ്ത്രീകളും കുട്ടികളും അടങ്ങുന്ന മുപ്പതോളം പേര് എകെജി ഭവന് സമീപത്ത് വെച്ച് ഒത്തുചേര്ന്ന് മുദ്രാവാക്യം വിളികളുമായി സിപിഎം ആസ്ഥാനത്തേയ്ക്ക് തള്ളിക്കയറാന് ശ്രമിയ്ക്കുകയായിരുന്നു.
ബാരിക്കേഡുകള് ഭേദിച്ച് അകത്ത് കടന്നവര് പോലീസുമായി ഉന്തും തള്ളും നടത്തിയതിനെ തുടര്ന്ന് ബലം പ്രയോഗിച്ച് ഇവരെ അറസ്റ്റ് ചെയ്തു.