എല്ഡിഎഫ് യോഗം: വിഎസിനെ ക്ഷണിച്ചില്ല
തിരുവനന്തപുരം: സ്വാശ്രയ പ്രശ്നം ചര്ച്ച ചെയ്യാനായി എല്ഡിഎഫ് യോഗം ബുധനാഴ്ച ഉണ്ടായിരുന്നതായി തനിയ്ക്ക് തോന്നുന്നില്ലെന്ന് മുഖ്യമന്ത്രി വിഎസ് അച്യുതാനന്ദന് പറഞ്ഞു. മന്ത്രിസഭാ യോഗതീരുമാനങ്ങള് വിശദീകരിക്കവെയാണ് വിഎസ് ഇക്കാര്യം പറഞ്ഞത്. എല്ഡിഎഫ് യോഗത്തിലേക്ക് മുഖ്യമന്ത്രിയെ ക്ഷണിച്ചില്ലെന്ന വാര്ത്തയെക്കുറിച്ച് മാധ്യമപ്രവര്ത്തകര് ചോദിച്ചപ്പോഴായിരുന്നു യോഗം നടന്നതായി കരുതുന്നില്ലന്ന് വിഎസ് പ്രതികരിച്ചത്.
എല്ഡിഎഫ് യോഗം ഉള്ളതായി എന്നെ ആരെങ്കിലും അറിയിക്കുകയോ ഞാന് ഇല്ലാതിരിയ്ക്കുകയോ ചെയ്തിട്ടില്ലെന്നും വിഎസ് പറഞ്ഞു. എകെജി സെന്ററില് നടന്ന യോഗത്തില് അങ്ങ് പങ്കെടുത്തില്ലെന്ന് റിപ്പോര്ട്ടുകള് ഉണ്ടല്ലോയെന്ന് ആരാഞ്ഞപ്പോല് എകെജി സെന്ററില് പല യോഗങ്ങളും കൂടാറുണ്ടെന്നായിരുന്നു അദ്ദേഹത്തിന്റെ മറുപടി. എന്റെ സാന്നിധ്യം ആവശ്യമില്ലാത്ത യോഗമായിരിക്കും കൂടിയത്. മുഖ്യമന്ത്രി പറഞ്ഞു. താന് കൊണ്ടാണ് സിപിഐ പ്രതിനിധികളും യോഗത്തില് നിന്നും വിട്ടു നിന്നത് എന്ന് പറയുന്നത് ശരിയല്ലെന്നും വിഎസ് വ്യക്തമാക്കി.
സ്വാശ്രയ പ്രശ്നം ചര്ച്ച ചെയ്യുന്നതിനായി ബുധനാഴ്ച വൈകിട്ട് തിരുവനന്തപുരത്ത് ചേര്ന്ന ഇടതുമുന്നണിയോഗം പത്തു മിനിറ്റിനുള്ളില് പിരിഞ്ഞിരുന്നു. യോഗത്തില് മുഖ്യമന്ത്രിയും സിപിഐയും പങ്കെടുത്തിരുന്നില്ല.
മുഖ്യമന്ത്രിയെ യോഗത്തിലേക്ക് ക്ഷണിക്കാത്തത് കൊണ്ടാണ് യോഗത്തില് നിന്ന് വിട്ടു നിന്നതെന്ന് സി പി ഐ വൃത്തങ്ങള് വിശദീകരിക്കുകയും ചെയ്തിരുന്നു. യോഗത്തിലേക്ക് ക്ഷണിച്ചിരുന്നില്ലെന്ന് മുഖ്യമന്ത്രിയുടെ ഓഫീസും വ്യക്തമാക്കിയിരുന്നു.
അതേ സമയം ബുധനാഴ്ച നടന്ന് എല്ഡിഎഫ് യോഗം തന്നെയാണെന്ന് പാര്ട്ടി പത്രമായ ദേശാഭിമാനി ഉറപ്പിച്ചു പറയുന്നു. സ്വാശ്രയ എന്ജിനീയറിങ്-മെഡിക്കല് പ്രവേശന കരാര് എല്ഡിഎഫ് യോഗം അംഗീകാരം നല്കിയതായി ദേശാഭിമാനിയുടെ റിപ്പോര്ട്ടിലുണ്ട്.