കോളെജ്‌ അധ്യാപക ഒഴിവുകള്‍ ജൂലായില്‍ നികത്തും

തിരുവനന്തപുരം: സംസ്ഥാനത്തെ സര്‍വകലാശാലകളില്‍ 'ചോയിസ്‌ ബേസ്‌ഡ്‌ ക്രെഡിറ്റ്‌ സിസ്‌റ്റം' ഏര്‍പ്പെടുത്തുന്നതിനുമുമ്പായി അധ്യാപകരുടെ ഒഴിവുകള്‍ നികത്തുമെന്ന്‌ വിദ്യാഭ്യാസ മന്ത്രി എംഎ ബേബി നിയമസഭയെ അറിയിച്ചു. സര്‍ക്കാര്‍ കോളേജുകളിലെ അധ്യാപക ഒഴിവുകള്‍ ജൂലൈ മാസം തന്നെ നികത്തും.

അടുത്ത ഘട്ടത്തില്‍ വിദൂരവിദ്യാഭ്യാസം സെമസ്റ്റര്‍ സമ്പ്രദായത്തിന്‍ കീഴില്‍ കൊണ്ടു വരുമെന്നും മന്ത്രി വ്യക്തമാക്കി. നിയമസഭയില്‍ ചോദ്യോത്തര വേളയില്‍ സംസാരിക്കുകയായിരുന്നു മന്ത്രി.

ക്രെഡിറ്റ്‌ ആന്‍ഡ്‌ സെമസ്‌റ്റര്‍ സമ്പ്രദായം നടപ്പാക്കുന്നതിന്റെ ഭാഗമായാണ്‌ അടിയന്തരമായി സര്‍ക്കാര്‍ കോളജുകളിലെ ഒഴിവുകള്‍ നികത്തുന്നത്‌. ആവശ്യമായ പഠനങ്ങള്‍ നടത്തിയതിന്‌ ശേഷമാണ്‌ ഉന്നത വിദ്യാഭ്യാസ രംഗത്തെ പരിഷ്‌കരണങ്ങള്‍ക്ക്‌ തുടക്കം കുറിച്ചത്‌. പരിഷ്‌കരണ പ്രവര്‍ത്തനങ്ങള്‍ ചെയ്‌തുകൊണ്‌ട്‌ മാത്രമേ ഇതിനെക്കുറിച്ച്‌ കൂടുതല്‍ പഠിയ്‌ക്കാനാവൂ. അതല്ലാതെ മുഴുവന്‍ പഠിച്ചു കഴിഞ്ഞ്‌ പദ്ധതി നടപ്പാക്കാന്‍ കഴിയില്ല.

ഓപ്പണ്‍ യൂണിവേഴ്‌സിറ്റി സ്‌ഥാപിക്കുന്നതിനുള്ള നടപടികള്‍ എടുത്തു വരികയാണ്‌. പരിഷ്‌കരണ പ്രവര്‍ത്തനങ്ങള്‍ ധൃതിയില്‍ നടപ്പാക്കുന്നു എന്ന ആരോപണം ശരിയല്ല. രണ്ടു വര്‍ഷം മുമ്പു തന്നെ ഇതു സംബന്ധിച്ച്‌ അധ്യാപക സംഘടനകളുമായും വിദ്യാര്‍ഥി സംഘടനകളുമായും ചര്‍ച്ചകള്‍ നടന്നിരുന്നതായും മന്ത്രി ചൂണ്ടിക്കാട്ടി.