നിര്ണായക പിബി ശനിയാഴ്ച: നേതാക്കള് ദില്ലിക്ക്
ദില്ലി: കേരളത്തിലെ സംഘടനപ്രശ്നങ്ങള് ചര്ച്ച ചെയ്യുന്നതിന് വേണ്ടി ചേരുന്ന പ്രത്യേക പിബി യോഗത്തില് പങ്കെടുക്കാനായി മുഖ്യമന്ത്രി വിഎസ് അച്യുതാനന്ദനും ആഭ്യന്തര മന്ത്രി കോടിയേരി ബാലകൃഷ്ണനും ദില്ലിയിലേക്ക് പോയ വിമാനം യന്ത്രത്തകരാറിനെ തുടര്ന്ന് നാഗ്പൂരില് ഇറക്കി.
മന്ത്രി എന്കെ പ്രേമചന്ദ്രനും വിമാനത്തില് ഉണ്ടായിരുന്നു. മൂവരും ഇപ്പോള് നാഗ്പൂര് വിമാനത്താവളത്തിലാണ്. ഒരു മണിയോടെ ദില്ലിയില് നിന്നും പ്രത്യേക വിമാനമെത്തി യാത്രക്കാരെ കൊണ്ടു പോകുമെന്ന് കോടിയേരി ബാലകൃഷ്ണന് അറിയിച്ചു.
സംസ്ഥാന സെക്രട്ടറി പിണറായി വിജയന് ഉച്ചയ്ക്കുള്ള വിമാനത്തിലാണ് ദില്ലിക്ക് പോകുന്നത്. ശനിയാഴ്ചയും ഞായറാഴ്ചയുമായാണ് പിബി യോഗം നടക്കുന്നത്.
രൂക്ഷമായ സംഘടനാപ്രശ്നങ്ങള് അഭിമുഖീകരിയ്ക്കുന്ന കേരളത്തിലെ സിപിഎം ഘടകത്തില് പിബി യോഗത്തിന് ശേഷം കാര്യമായ മാറ്റങ്ങള് ഉണ്ടാവുമെന്നാണ് കരുതപ്പെടുന്നത്. പക്ഷേ ഇത് വിഎസ്-പിണറായി വിഭാഗങ്ങളെ എങ്ങനെ ബാധിയ്ക്കുമെന്ന കാര്യം പ്രവചിയ്ക്കുക ബുദ്ധിമുട്ടേറിയ കാര്യമാണ്.
പാര്ട്ടി തത്വങ്ങള് ലംഘിച്ചു കൊണ്ടുള്ള നേതാക്കളുടെ പോക്ക്, വിഭാഗീയത, ലാവലിന് കുറ്റപത്രത്തെ തുടര്ന്നുള്ള സാഹചര്യങ്ങള് തുടങ്ങിയവയാണ് പ്രധാനമായും പിബിയോഗത്തില് ചര്ച്ച ചെയ്യപ്പെടുക.