വ്യജ പീഡനാരോപണം: വനിതാ ക്യാപ്‌റ്റനെ പുറത്താക്കി

ദില്ലി: മുതിര്‍ന്ന ഉദ്യോഗസ്ഥര്‍ ശാരീരികമായും മാനസികമായും പീഡിപ്പിക്കാന്‍ ശ്രമിച്ചെന്നും ചെറുത്തു നിന്നപ്പോള്‍ നിയമവിരുദ്ധമായി തടഞ്ഞുവെച്ചെന്നും പരാതിപ്പെട്ട വനിതാ ക്യാപ്‌റ്റനെ സൈനിക കോടതി പുറത്താക്കി.

കല്‍ക്കയിലെ ആര്‍മി സര്‍വീസ്‌ കോര്‍പ്‌സ്‌ അംഗമായ പൂനം കൗറാണ് സൈനിക കോടതിയുടെ ശിക്ഷയ്‌ക്ക്‌ വിധേയായത്‌. അഞ്ച്‌ മാസം നീണ്ട വിചാരണയ്‌ക്കൊടുവില്‍ പൂനത്തിന്റെ ആരോപണങ്ങള്‍ കളവാണെന്ന്‌ കോടതി കണ്ടെത്തിയിരുന്നു. ഇതേ തുടര്‍ന്നാണ്‌ നടപടി. ഇന്ത്യന്‍ സേനയുടെ ചരിത്രത്തിലാദ്യമായാണ് ഒരു വനിതാ ഓഫീസര്‍ കോര്‍ട്ട് മാര്‍ഷലിന്റെ ശിക്ഷയ്ക്ക് വിധേയയാകുന്നത്.

ആര്‍മി കമാന്‍ഡിങ്‌‌ ഓഫീസര്‍മാരായ കേണല്‍ ആര്‍കെ ശര്‍മ, ലഫ്‌ കേണല്‍ അജയ്‌ ചാവ്‌ല, മേജര്‍ സുരാജ്‌ ഭാന്‍ എന്നിവരുടെ ഇംഗിതങ്ങള്‍ക്ക്‌ വഴങ്ങാത്തതിനെ തുടര്‍ന്ന്‌ തന്നെ ശാരീരികമായും മാനസികമായും പീഡിപ്പിക്കുകയായിരുന്നെന്നാണ്‌ പൂനത്തിന്റെ ആരോപണം.

2007 ഒക്‌ടോബറില്‍ കല്‍ക്കിയിലെ മുതല്‍ പീഡനം തുടങ്ങിയതെന്നും പൂനം നല്‌കിയ പരാതിയിലുണ്ടായിരുന്നു. രാത്രി വൈകുവോളം ഉള്ള പാര്‍ട്ടികളില്‍ തന്നെ മുതിര്‍ന്ന ഉദ്യോഗസ്ഥര്‍ വിളിച്ചു വരുത്താറുണ്ടായിരുന്നുവെന്നും പൂനം ആരോപിച്ചിരുന്നു. എന്നാല്‍ കേസന്വേഷണത്തില്‍ പൂനത്തിന്റെ ആരോപണങ്ങള്‍ വ്യാജമാണെന്ന്‌ തെളിഞ്ഞതായി സൈനിക വൃത്തങ്ങള്‍ പറഞ്ഞു. സേനയുടെ പശ്ചിമ മേധാവിയുടെ സ്ഥിരീകരണത്തിന്‌ വിധേയമായാണ്‌ സൈനിക കോടതിയുടെ ഉത്തരവ്‌.