ദില്ലി മെട്രോയില് വീണ്ടും അപകടം
ദില്ലി: ദില്ലിയില് ഞായറാഴ്ച തകര്ന്ന മെട്രോ മേല്പ്പാലത്തിന്റെ അവശിഷ്ടങ്ങള് നീക്കുന്നതിനിടെ വീണ്ടും അപകടം. അവശിഷ്ടങ്ങള് നീക്കാന് ശ്രമിയ്ക്കുന്നതിനിടെ 3 കൂറ്റന് ക്രെയിനുകള് ഭാരം താങ്ങാനാവാതെ തകര്ന്നു വീഴുകയായിരുന്നു. അപകടത്തില് രണ്ട് പേര്ക്ക് പരിക്കേറ്റു.
സംഭവം നടക്കുമ്പോള് നൂറുക്കണക്കിന് തൊഴിലാളികള് അവിടെയുണ്ടായിരുന്നു. ക്രെയിന് തകര്ന്ന് വീഴുന്നത് കണ്ട് ഇവര് ഓടിമാറിയതിനാലാണ് വന്ദുരന്തം ഒഴിവായത്. ദില്ലി മെട്രോ റെയില് കോര്പ്പറേഷന് മാനേജിങ് ഡയറക്ടര് ഇ ശ്രീധരന് സംഭവ സ്ഥലം സന്ദര്ശിച്ചതിനു പിന്നാലെയാണ് അപകടം ഉണ്ടായത്.
ഞായറാഴ്ച നടന്ന അപകടത്തില് ആറു പേര് മരിച്ചിരുന്നു. അതേ സമയം അപകടത്തിന്റെ ധാര്മ്മിക ഉത്തരവാദിത്വം ഏറ്റെടുത്ത് ഡിഎംആര്സി എംഡി ഇ ശ്രീധരന് നല്കിയ രാജി സ്വീകരിയ്ക്കാന് ദില്ലി സര്ക്കാര് തയാറായില്ല. ഇ ശ്രീധരന് മാനേജിങ് ഡയറക്ടറായി തുടരുമെന്ന് ദില്ലി മുഖ്യമന്ത്രി ഷീല ദീക്ഷിത് വ്യക്തമാക്കി. രാജി സ്വീകരിച്ചിട്ടില്ലെന്നും ശ്രീധരന്റെ സേവനം ദില്ലി മെട്രോയ്ക്ക് ആവശ്യമാണെന്നും ഷില ദീക്ഷിത് പറഞ്ഞു.
ശ്രീധരന് രാജിവെച്ചാല് കോമണ്വെല്ത്ത് ഗെയിംസുമായി ബന്ധപ്പെട്ട പദ്ധതികളുടെ നടത്തിപ്പിനെ ബാധിക്കുമെന്നാണ് സര്ക്കാരിന്റെ വിലയിരുത്തല്. എഴുപത്തിയേഴാം ജന്മദിനമായ ഞായറാഴ്ച ഏറെ വികാരഭരിതനായാണു ഡോ ഇ ശ്രീധരന് രാജിവാര്ത്ത മാധ്യമങ്ങളെ അറിയിച്ചത്.