മായാവതിയ്‌ക്കെതിരായ കേസ്‌ ആറാഴ്‌ചത്തേക്ക്‌‌ നീട്ടി

ദില്ലി: വരവില്‍ കവിഞ്ഞ സ്വത്ത്‌ സമ്പാദിച്ചെന്ന ഉത്തര്‍പ്രദേശ്‌ മുഖ്യമന്ത്രിയും ബിഎസ്‌പി നേതാവുമായ മായാവതിയുടെ കേസ്‌ പരിഗണിക്കുന്നത്‌ സുപ്രീംകോടതി ആറാഴ്‌ചത്തേക്ക്‌ നീട്ടിവച്ചു. കേസ്‌ നീട്ടിവയ്‌ക്കണമെന്ന്‌ ഉത്തര്‍പ്രദേശ്‌ സര്‍ക്കാരിന്റെ അഭ്യര്‍ത്ഥന സ്വീകരിച്ചാണ്‌ നടപടി.

മായാവതിയ്‌ക്കെതിരായ കേസില്‍ ശനിയാഴ്‌ച സിബിഐ സുപ്രീംകോടതിയില്‍ സത്യവാങ്‌മൂലം സമര്‍പ്പിച്ചിരുന്നു. 12 പേജ്‌ വരുന്ന സത്യവാങ്‌മൂലത്തില്‍ കേസിന്റെ അന്വേഷണം പൂര്‍ത്തിയായതായി സി.ബി.ഐ വ്യക്തമാക്കിയിരുന്നു.

2007ലെ നിയമസഭാ തെരഞ്ഞെടുപ്പില്‍ മത്സരിയ്‌ക്കുന്നതിന്‌ നല്‍കിയ സത്യവാങ്‌മൂലത്തില്‍ ഒരു കോടിയുടെ സ്വത്ത്‌ ഉണ്ടെന്നായിരുന്നു മായാവതി വെളിപ്പെടുത്തിയിരുന്നത്‌. എന്നാല്‍ ആ സമയത്ത്‌ മായയുടെ പക്കല്‍ 50 കോടിയിലേറെ സ്വത്തുണ്ടായിരുന്നുവെന്ന്‌ സിബിഐ പറയുന്നു. 2003ലാണ്‌ സിബിഐ മായാവതിക്കെതിരെ കേസെടുത്തത്‌.