വിഎസ്‌ അനുകൂലപ്രകടനത്തിനു നേരെ അക്രമം

ആലപ്പുഴ: അമ്പലപ്പുഴയില്‍ വിഎസ്‌ അനുഭാവികള്‍ നടത്തിയ പ്രകടനത്തിനു നേരെ പഞ്ചായത്ത്‌ പ്രസിഡന്റിന്റെ നേതൃത്വത്തില്‍ ആക്രമണം. അമ്പലപ്പുഴ വടക്ക്‌ പഞ്ചായത്തില്‍ നിന്ന്‌ ആരംഭിച്ച പ്രകടനത്തില്‍ സിപിഎം പ്രവര്‍ത്തകരടക്കം നൂറിലേറെ പേര്‍ ഉണ്ടായിരുന്നു.

മുഖ്യമന്ത്രി വിഎസ്‌ അച്യുതാനന്ദന്റെ പ്ലക്കാര്‍ഡുമേന്തി പ്രകടനം നടത്തുകയായിരുന്ന ഇവരെ അമ്പലപ്പുഴ കച്ചേരിപ്പടിയിലെ മെയിന്‍ റോഡിലെത്തിയപ്പോള്‍ ഒരു സംഘം അക്രമിയ്‌ക്കുകയായിരുന്നു.

പഞ്ചായത്ത്‌ പ്രസിഡന്റ്‌ അരുണിന്റെ നേതൃത്വത്തിലുള്ള സംഘമാണ്‌ ആക്രമണം നടത്തിയത്‌. പ്രകടനക്കാരുടെ പക്കലുണ്ടായിരുന്ന പ്ലക്കാര്‍ഡും കൊടികളും വാങ്ങി ഒടിച്ചതിനു ശേഷം പ്രകടനക്കാരെ തലങ്ങും വിലങ്ങും തല്ലുകയായിരുന്നു.

സംഭവം റിപ്പോര്‍ട്ട്‌ ചെയ്യാനെത്തിയ മാധ്യമപ്രവര്‍ത്തകര്‍ക്ക്‌ നേരെയും ആക്രമണമുണ്ടായി. എന്നാല്‍ പോലീസ്‌ ആക്രമികളെ സംരക്ഷിയ്‌ക്കുന്ന നിലപാടാണ്‌ സ്വീകരിച്ചതെന്ന്‌ ആരോപണമുയര്‍ന്നിട്ടുണ്ട്‌.