ഒന്നാം മാറാട്‌: പ്രതികള്‍ക്ക്‌ 5 വര്‍ഷം തടവ്‌

കോഴിക്കോട്‌: മാറാട്‌ ഒന്നാം കലാപത്തോടനുബന്ധിച്ച്‌ സീമാമുന്റകത്ത്‌ അസൈനാരുടെ വീട്‌ കത്തിച്ച കേസിലെ മൂന്നു പ്രതികള്‍ക്കും അഞ്ചു വര്‍ഷം വീതം തടവും 20,000 രൂപ വീതം പിഴയും ശിക്ഷ വിധിച്ചു. പ്രത്യേക കോടതി ജഡ്‌ജി കെപി പ്രസന്നകുമാരിയാണ്‌ വിധി പ്രഖ്യാപിച്ചത്‌.

കേസിലെ പ്രതികളായ മാറാട്‌ ചോയിച്ചന്റകത്ത്‌ സോമന്‍, ചോയിച്ചന്റകത്ത്‌ തമ്പി, ചോയിച്ചന്റകത്ത്‌ വേലായുധന്‍ എന്നിവര്‍ കുറ്റക്കാരാണെന്ന്‌ കോടതി ചൊവ്വാഴ്‌ച കണ്ടെത്തിയിരുന്നു.

2002 ജനുവരി മൂന്നിനാണു കേസിനാസ്‌പദമായ സംഭവം. പ്രതികള്‍ സംഘം ചേര്‍ന്നു കലാപം ഉണ്ടാക്കാനായി വീട്ടില്‍ അതിക്രമിച്ചു കയറുകയും വീട്‌ തീവച്ചു നശിപ്പിക്കുകയും ചെയ്‌തെന്നാണു പ്രോസിക്യൂഷന്‍ കേസ്‌. ഇതേ തുടര്‍ന്നുള്ള സംഭവവികാസങ്ങളാണ്‌ രണ്ടാം മാറാട്‌ കലാപത്തിലേക്ക്‌ വഴിതെളിച്ചത്‌.

ഇന്ത്യന്‍ ശിക്ഷാനിയമത്തിലെ 143, 147, 148, 153(എ), 427, 436, 450 എന്നീ വകുപ്പുകള്‍ പ്രകാരം കരുതിക്കൂട്ടിയുള്ള അക്രമം, സംഘര്‍ഷം തുടങ്ങിയ കുറ്റങ്ങളാണ്‌ പ്രതികളുടെ മേല്‍ ചുമത്തിയിരുന്നത്‌്‌. 22 സാക്ഷികളെ കേസിന്റെ ഭാഗമായി വിസ്‌തരിച്ചു. പ്രോസിക്യൂഷനു വേണ്ടി സ്‌പെഷല്‍ പ്രോസിക്യൂട്ടര്‍ അഡ്വ പിഡി രവിയും പ്രതികള്‍ക്കു വേണ്ടി അഡ്വ ബി. എന്‍ ബിനീഷ്‌ ബാബുവും ഹാജരായി.