മഴ: കറുകുറ്റിയില് റെയില് പാളം അപകടത്തില്
തൃശൂര്: കനത്ത മഴയെതുടര്ന്ന് അങ്കമാലിയ്ക്കടുത്ത് കറുകുറ്റിയില് റെയില്പാളത്തിനടുത്തുള്ള മണ്ണ് ഒലിച്ച് പോയി. പാളം അപകടത്തിലാണ്. ഈവഴിയില് രണ്ട് പാളങ്ങളുണ്ട്. അതില് ഒന്നിനടുത്താണ് മണ്ണ് ഒലിച്ച് പോയത്. തീവണ്ടി ഗതാഗതം ഒരു ട്രാക്കിലൂടെ മാത്രമാക്കിയിട്ടുണ്ട്. അതിനാല് മിയ്ക്ക തീവണ്ടികളും നാല് മണിയ്ക്കൂറോളം വൈകിയാണ് ഒടുന്നത്.
50മീറ്റര് നീളത്തിലാണ് പാളം ഉറപ്പിച്ചിരിയ്ക്കുന്ന മണ്ണും കരിങ്കല് ജെല്ലിയും ഒലിച്ച് പോയത്. കുറുകുറ്റിയ്ക്ക് സമീപം മാമ്പ്രയിലാണ് ഇതുണ്ടായത്. അടുത്തുള്ള ഒരു കനാല് പൊട്ടി ഒലിച്ചാണ് ഇത് സംഭവിച്ചത്.
വെള്ളിയാഴ്ച രാത്രി (ശനിയാഴ്ച അതിരാവിലെ) 12.10 ന് രാജഥാനി എക്സ്പ്രസ് അപകടത്തില് പെടാതെ കഷ്ടിച്ച് രക്ഷപ്പെട്ടു. പാളത്തിന്റെ അവസ്ഥ മനസ്സിലാക്കിയ റെയില്വെ അധികൃതര് ഈ തീവണ്ടി കറുകുറ്റിയില് നിറുത്തിപ്പിച്ചു.
റെയില്വെ ജീവനക്കാര് അറ്റകുറ്റ പണികള് തുടങ്ങിയിട്ടുണ്ട്. ഞായറാഴ്ചയോടെ മാത്രമേ പണി പൂര്ത്തിയാകുകയുള്ളു.
വൈകിട്ട് 5.40ന് പുറപ്പെടേണ്ട എറണാകുളം -നിസാമുദ്ദീന് എക്സ്പ്രസ് പത്തു മണിക്കു മാത്രമേ പുറപ്പെടുകയുള്ളൂ. തിരുവനന്തപുരം -ചെന്നൈ എക്സ്പ്രസ് രാത്രി 7.30നായിരിയ്ക്കും തിരുവനന്തപുരത്തു നിന്ന് പുറപ്പെടുക. വൈകീട്ട് 4.05 ന് തിരിയ്ക്കേണ്ട കൊച്ചുവേളി -ബാംഗൂര് എക്സ്പ്രസ് രാത്രി ഒന്പതിനു് മാത്രമേ പുറപ്പെടുകയുള്ളു.
കഴിഞ്ഞ മൂന്ന് ദിവസമായി വടക്കന് കേരളത്തിലും മദ്ധ്യ കേരളത്തിലും കാലവര്ഷം കനത്തിട്ടുണ്ട്.