കസബിന്റെ അഭിഭാഷകന്‍ കസ്‌മി പിന്മാറുന്നു

മുംബൈ: മുംബൈ ഭീകരാക്രമണക്കേസില്‍ വിചാരണ നേരിടുന്ന തീവ്രവാദി അജ്‌മല്‍ കസബിന്റെ കാര്യത്തില്‍ വീണ്ടും പ്രശ്‌നങ്ങള്‍ ഉടലെടുക്കുന്നു.

കേസില്‍ നിന്നും പിന്‍മാറാന്‍ തന്നെ അനുവദിക്കണമെന്ന്‌ കസബിന്റെ അഭിഭാഷകന്‍ അബ്ബാസ്‌ കസ്‌മി കോടതിയോട്‌ അഭ്യര്‍ത്ഥിച്ചു. തന്റെ കക്ഷിയ്‌ക്കും തന്നിലുള്ള വിശ്വാസം നഷ്ടപ്പെട്ടെന്നാണ്‌ ഇതിന്‌ കാരണമായി കസ്‌മി കോടതിയെ അറിയിച്ചത്‌.

അതേസമയം തന്നെ കേസില്‍ വിചാരണ തുടരാന്‍ കോടതി തീരുമാനിച്ചു. അജ്‌മല്‍ കസബിന്റെ കുറ്റസമ്മതമൊഴിയുടെ അടിസ്ഥാനത്തില്‍ കേസില്‍ വിധി പറയാന്‍ കോടതി വിസമ്മതിച്ചു. കേസില്‍ പ്രത്യേക ജഡ്‌ജി എംഎല്‍ തഹലിയാനി കസബിന്റെ മൊഴികള്‍ രേഖപ്പെടുത്തിയിട്ടുണ്ട്‌.

കസബിന്റെ കുറ്റസമ്മത മൊഴികള്‍ സ്വീകരിക്കണമെന്നും കൂടുതല്‍ തെളിവുകള്‍ സമര്‍പ്പിക്കാന്‍ പ്രോസിക്യൂഷന്‌ അവസരം നല്‍കണമെന്നും അഭിഭാഷകന്‍ ഉജ്ജ്വല്‍ നിഗം കോടതിയോട്‌ അഭ്യര്‍ത്ഥിച്ചിട്ടുണ്ട്‌.

ആക്രമണത്തില്‍ തന്റെ പങ്കിനെക്കുറിച്ച്‌ കസബ്‌ പൂര്‍ണമായ വെളിപ്പെടുത്തല്‍ നടത്തിയിട്ടില്ലെന്നും അദ്ദേഹം കോടതിയില്‍ ചൂണ്ടിക്കാണിച്ചു.

മുംബൈ ആക്രമണക്കേസില്‍ കുറ്റം സമ്മതിച്ചതിന്‌ പിന്നാലെ തന്റെ തൂക്കിക്കൊല്ലാന്‍ വിധിക്കണമെന്ന്‌ ബുധനാഴ്‌ച കസബ്‌ കോടതിയില്‍ പറഞ്ഞിരുന്നു.