മൈക്രോസോഫ്‌റ്റിന്റെ ലാഭത്തില്‍ ഇടിവ്‌

ന്യൂയോര്‍ക്ക്‌: പ്രമുഖ സോഫ്‌റ്റ്‌വേര്‍ കമ്പനി മൈക്രോസോഫ്‌റ്റിന്റെ ലാഭത്തില്‍ വന്‍ ഇടിവ്‌. ഏപ്രില്‍ മുതല്‍ ജൂണ്‍വരെയുള്ള പാദവാര്‍ഷിക റിപ്പോര്‍ട്ടിലാണ്‌ കമ്പനിയുടെ വരുമാനത്തിലും ലാഭത്തിലും ഇടിവുണ്ടായതായി വ്യക്തമാക്കിയിരിക്കുന്നത്‌.

തുടര്‍ച്ചയായ മൂന്നാം പാദവര്‍ഷത്തിലാണ്‌ മൈക്രോസോഫ്‌റ്റിന്റെ വ്യാപാരത്തില്‍ ഇടിവ്‌ രേഖപ്പെടുത്തുന്നത്‌. ഏപ്രില്‍ ജൂണ്‍ കാലയളവില്‍ 310 കോടി ഡോളറിന്റെ ലാഭമാണ്‌ കമ്പനി രേഖപ്പെടുത്തിയത്‌.

2008ല്‍ ഇതേകാലയളവിലുണ്ടായിരുന്നലഭാവുമായി താരതമ്യപ്പെടുത്തുമ്പോള്‍ 29 ശതമാനം കുറവാണിത്‌. ഇക്കാലയളവില്‍ കമ്പനിയുടെ വരുമാനം 1310കോടി ഡോളര്‍ മാത്രമാണ്‌. മുന്‍വര്‍ഷത്തെ അപേക്ഷിച്ച്‌ വരുമാനത്തില്‍ 17 ശതമാനത്തിന്റെ കുറവാണുണ്ടായിരിക്കുന്നത്‌.

മൈക്രോസോഫ്‌റ്റിന്റെ വ്യാപാരം 1400 കോടി ഡോളര്‍ കടക്കുമെന്നാണ്‌ വാള്‍സ്‌ട്രീറ്റ്‌ ജേണല്‍ മുമ്പ്‌ കണക്കാക്കിയിരുന്നത്‌. വിന്‍ഡോസ്‌ ഓപ്പറേറ്റിങ്‌ സിസ്റ്റത്തിന്റെയും സോഫ്‌റ്റ്‌ വേര്‍ പാക്കേജുകളുടെയും ആവശ്യം കുറഞ്ഞതാണ്‌ കമ്പനിയ്‌ക്കു തിരിച്ചടിയായത്‌.

സമ്പദ്‌ വ്യവസ്ഥയിലെ മാന്ദ്യം തുടരുമെന്നതിനാല്‍ വരുമാനം വര്‍ധിപ്പിക്കാനായി പുതിയ മാര്‍ഗങ്ങള്‍ തേടേണ്ടിവരുമെന്ന്‌ കമ്പനി സിഎഫ്‌ഒ ക്രിസ്‌ ലിഡല്‍ പറഞ്ഞു.

സാമ്പത്തിക മാന്ദ്യത്തെത്തുടര്‍ന്ന്‌ ഒട്ടേറെ ജീവനക്കാരെ പിരിച്ചുവിടാന്‍ മൈക്രോസോഫ്‌റ്റ്‌ തീരുമാനിച്ചിരുന്നു. ഇപ്പോള്‍ ലാഭം വീണ്ടും ഇടിഞ്ഞ സാഹചര്യത്തില്‍ ചെലവു ചുരുക്കല്‍ ഉള്‍പ്പെടെയുള്ള മാര്‍ഗങ്ങള്‍ സ്വീകരിക്കാനാണ്‌ കമ്പനി ആലോചിക്കുന്നത്‌.