നിയമസഭയില്‍ കടന്ന പാമ്പ്‌ ഒരാളെ കടിച്ചു

ഭുവനേശ്വര്‍: വ്യാഴാഴ്‌ച മുതല്‍ ഭീതി പരത്തിക്കൊണ്ട്‌ ഒറീസ നിയമസഭയിലെ പരവതാനികള്‍ക്കിടയില്‍ എവിടെയോ ഒളിച്ചിരുന്ന പാമ്പ്‌ ഒടുവില്‍ ശനിയാഴ്‌ച ഒരാളെ കടിച്ചു.

സഭയിലെ ഡപ്യൂട്ടി മാര്‍ഷല്‍ അമിയ സത്‌പതിയെയാണ്‌ പാമ്പ്‌ കടിച്ചത്‌. ഇദ്ദേഹത്തെ ആശുപത്രിയില്‍ പ്രവേശിച്ചു. പാമ്പിനെ പിന്നീട്‌ ഒരു പാമ്പു പിടുത്തക്കാരന്‍ പിടിച്ചു. വിഷമില്ലാത്ത പാമ്പാണിതെന്ന്‌ അതിനെ പിടിച്ചയാള്‍ പറഞ്ഞു.

വ്യാഴാഴ്‌ച രാവിലെ സഭ തുടങ്ങുന്നതിന്‌ മുമ്പ്‌ മുഖ്യമന്ത്രി നവീന്‍ പട്‌നായികിന്റെ മേശയ്‌ക്ക്‌ സമീപമാണ്‌ പാമ്പിനെ ആദ്യം കണ്ടത്‌. തുടര്‍ന്ന്‌ വന്‍ സന്നാഹങ്ങളോടെ പാമ്പിനായി തിരച്ചില്‍ നടത്തിയെങ്കിലും കണ്ടെത്താന്‍ കഴിഞ്ഞില്ല.

പിന്നീട്‌ ശനിയാഴ്‌ച രാത്രിയിലാണ്‌ പാമ്പിനെ കാണുന്നത്‌. പാമ്പിനെ കണ്ടെത്തി അധികം താമസിയാതെ അത്‌ മാര്‍ഷലിനെ കടിക്കുകയായിരുന്നുവെന്ന്‌ അധികൃതര്‍ പറയുന്നു. ശനിയാഴ്‌ച സഭ പിരിഞ്ഞ്‌ അല്‍പസമയം കഴിഞ്ഞപ്പോള്‍ ഒരു കസേരയ്‌ക്കടിയില്‍ ചുരുണ്ടുകിടക്കുന്ന നിലയിലാണ്‌ പാമ്പിനെ കണ്ടെത്തിയത്‌.

ഉടന്‍തന്നെ അലാം മുഴക്കി. പാമ്പു പിടുത്തക്കാര്‍ എത്തി അതിനെ പിടിച്ച്‌ സഭയ്‌ക്ക്‌ പുറത്തുകൊണ്ടുപോയി. വ്യാഴാഴ്‌ച പാമ്പിനെ കണ്ടതിനെത്തുടര്‍ന്ന്‌ സഭ നിര്‍ത്തിവച്ചിരുന്നു. പിന്നീട്‌ വെള്ളിയാഴ്‌ച മുന്‍കരുതലെന്ന നിലയില്‍ ഷൂസ്‌ ധരിച്ചാണ്‌ അംഗങ്ങളെല്ലാം സഭയില്‍ എത്തിയത്‌.