സ്വാശ്രയം: വാദിയും പ്രതിയുമില്ലെന്ന്‌ സുധാകരന്‍

തിരുവനന്തപുരം: സ്വാശ്രയ മേഖലയിലെ പ്രശ്‌നങ്ങളില്‍ എല്ലാവര്‍ക്കും ഉത്തരവാദിത്തമുണ്ടെന്ന്‌ സഹകരണ മന്ത്രി ജി സുധാകരന്‍. സ്വാശ്രയ പ്രശ്‌നത്തില്‍ വാദിയും പ്രതിയും ഇല്ലെന്നും അദ്ദേഹം പറഞ്ഞു.

വിമര്‍ശനം ഉന്നയിക്കാന്‍ എല്ലാവര്‍ക്കും അവകാശമുണ്ട്‌. എല്ലാവരും അത്‌ ചെയ്യുന്നുമുണ്ട്‌. എന്നാല്‍ ആരും പരിഹാരമാര്‍ഗം നിര്‍ദ്ദേശിക്കുന്നില്ല.

ഫീസുകൂട്ടിയും സംസ്ഥാനത്തെ സഹകരണ സ്വാശ്രയ കോളജുകള്‍ നഷ്ടത്തിലാണ്‌ നഷ്ടം സഹിക്കാന്‍ സഹകരണവകുപ്പ്‌ തയ്യാറാണ്‌. കോളെജുകള്‍ക്ക്‌ സബ്‌സിഡി നല്‍കേണ്ട കാര്യം തീരുമാനിക്കേണ്ടത്‌ ധനവകുപ്പാണ്‌-മന്ത്രി പറഞ്ഞു.

കാര്യങ്ങള്‍മനസ്സിലാക്കിവേണം മാധ്യമ പ്രവര്‍ത്തനം വിമര്‍ശനം ഉന്നയിക്കാനെന്ന്‌ സുധാകരന്‍ നിര്‍ദ്ദേശിച്ചു. പുതിയ കരാര്‍കൊണ്ട്‌ എന്തെങ്കിലും പ്രയോജനം ഉണ്ടായിട്ടുണ്ടോയെന്ന ചോദ്യം മന്ത്രിയെ പ്രകോപിപ്പിച്ചു.

നിങ്ങള്‍ക്ക്‌ വിവരമുണ്ടോയെന്ന മറുചോദ്യമാണ്‌ മന്ത്രി ഉന്നയിച്ചത്‌. എന്ത്‌ വ്യത്യാസമാണ്‌ പുതയി കരാര്‍ ഉണ്ടാക്കിയതെന്നകാര്യം താന്‍ കഴിഞ്ഞദിവസം വിശദീകരിച്ചതാണെന്നും അത്‌ മനസ്സിലാക്കണമായിരുന്നുവെന്നും അദ്ദേഹം പറഞ്ഞു.

ചോദ്യം ഉന്നയിച്ച മാധ്യമപ്രവര്‍ത്തകനോട്‌ നിങ്ങള്‍ വേലക്കാനായി പ്രവര്‍ത്തിക്കുകയാണെന്ന്‌ മന്ത്രി പറഞ്ഞു.കാര്യങ്ങള്‍ മനസ്സിലാക്കാതെ സംസാരിക്കരുത്‌. മാധ്യമപ്രവര്‍ത്തകരാണെന്ന്‌ കരുതി എന്തും പറയാമെന്ന്‌ കരുതരുത്‌.

ആര്‍ക്കും പത്രക്കാരാവും. ഞാനും പണ്ട്‌ ദേശാഭിമാനിക്കുവേണ്ടി റിപ്പോര്‍ട്ട്‌ ചെയ്‌തിട്ടുണ്ട്‌- എന്നിങ്ങനെ പറഞ്ഞ്‌ മന്ത്രി രോഷാകുലനായി.