ജോസഫ് വീണ്ടും മന്ത്രിസ്ഥാനത്തേയ്ക്ക്
തൊടുപുഴ: വിമാനയാത്രാക്കേസില് കോടതി വിമുക്തനാക്കിയ കേരളാ കോണ്ഗ്രസ് ജോസഫ് ഗ്രൂപ്പ് അധ്യക്ഷന് പിജെ ജോസഫ് മന്ത്രി സ്ഥാനം ഏറ്റെടുക്കാന് തയ്യാറാണെന്ന് അറിയിച്ചു.
ജോസഫിനെ മന്ത്രിയാക്കുന്നതിനായി മോന്സ് ജോസഫ് പൊതുമരാമത്തു മന്ത്രിസ്ഥാനം ജൂലൈ 31ന് രാജിവയ്ക്കുമെന്നാണ് അറിയുന്നത്. ജോസഫിന്റെ സത്യപ്രതിജ്ഞ ആഗസ്റ്റ് മൂന്നിനോ നാലിനോ ഉണ്ടാവുമെന്നും അറിയുന്നു.
പാര്ട്ടി തീരുമാനപ്രകാരം മന്ത്രിസ്ഥാനം ഏറ്റെടുക്കുകയാണെന്നും തീയതി ഉടന് അറിയിക്കുമെന്നും ജോസഫ് മാധ്യമപ്രവര്ത്തകരോട് പറഞ്ഞു. ജോസഫിനെ കോടതി കുറ്റവിമുക്തനാക്കിയ ഉടന് മോന്സ് ജോസഫ് രാജിസന്നദ്ധത അറിയിച്ചിരുന്നു. എന്നാല് അന്ന് ജോസഫ് അതിനോട് പ്രതികരിച്ചിരുന്നില്ല.
ജോസഫിനൊപ്പം വാര്ത്താസമ്മേളനത്തില് പങ്കെടുത്ത മുതിര്ന്ന നേതാവ് ഫ്രാന്സിസ് ജോര്ജ്ജും പാര്ട്ടി തീരുമാനം ഇതുതന്നെയാണെന്ന് വ്യക്തമാക്കി.
വിമാനയാത്രക്കിടെ സഹയാത്രികയോട്് അപമര്യാദയായി പെരുമാറിയെന്ന കേസിനെത്തുടര്ന്ന് എല്ഡിഎഫ് നേതൃത്വം ജോസഫിനോട് മന്ത്രിസ്ഥാനം രാജിവച്ച് അന്വേഷണത്തെ നേരിടാന് നിര്ദ്ദേശിക്കുകയായിരുന്നു. കേസില് ചെന്നൈ കോടതി ജോസഫിനെ കുറ്റവിമുക്തനാക്കി.
അന്നുമുതല് തന്നെ ജോസഫ് മന്ത്രിസ്ഥാനത്ത് തിരിച്ചെത്തുമെന്ന് അഭ്യൂഹമുണ്ടായിരുന്നു. ജോസഫ് രാജിവച്ചപ്പോള് ടി.യു കുരുവിളയായിരുന്നു മന്ത്രിയായി ചുമതലയേറ്റത്. എന്നാല് രാജകുമാരി ഭൂമിയിടപാടില് ഉള്പ്പെട്ടതോടെ കുരുവിളയ്ക്കും മന്ത്രിസ്ഥാനം രാജിവയ്ക്കേണ്ടിവന്നു. തുടര്ന്നാണ് മോന്സ് ജോസഫ് മന്ത്രിയായത്.