സ്വാശ്രയം: ബിനോയ് വിശ്വത്തിന് വിമര്ശനം
തിരുവനന്തപുരം: സ്വാശ്രയ കോളെജ് പ്രശ്നവുമായി രൂപീകരിച്ച മന്ത്രിസഭാ ഉപസമിതിയിലെ സിപിഐ പ്രതിനിധി മന്ത്രി ബിനോയ് വിശ്വത്തിന് പാര്ട്ടി നിര്വ്വാഹക സമിതിയില് രൂക്ഷവിമര്ശനം.
മന്ത്രിസഭാ ഉപസമിതിയില് പാര്ട്ടി പ്രതിനിധിയുടെ കടമ ബിനോയ് വേണ്ടവിധം നിര്വ്വഹിച്ചില്ലെന്നായിരുന്നു പ്രധാന ആരോപണം. പാര്ട്ടിയുടെ നിലാപാടുകള് ശക്തിയായി അവതരിപ്പിക്കുന്നതില് വീഴ്ച വന്നു. കരാറിന്റെ ദോഷവശങ്ങളെക്കുറിച്ച് തക്കസമയത്ത് പാര്ട്ടി നേതൃത്വത്തെ മന്ത്രി അറിയിച്ചോ എന്ന ചോദ്യവും യോഗത്തില് ഉയര്ന്നു.
അങ്ങനെയാണെങ്കില് പാര്ട്ടി സെക്രട്ടേറിയറ്റിനും വീഴ്ച ഉണ്ടായിട്ടുണ്ടെന്നുള്ള അഭിപ്രായവും യോഗത്തില് ഉണ്ടായി. ഇത്തരം കാര്യങ്ങള് ശ്രദ്ധിക്കാനും ഇടപെടാനുമാണ് സെക്രട്ടേറിയറ്റ് രൂപീകരിച്ചത്. തന്റെ അഭിപ്രായ വ്യത്യാസം ചൂണ്ടിക്കാട്ടി മന്ത്രി ബിനോയ് കത്തുകൊടുത്ത ഘട്ടത്തിലും സെക്രട്ടേറിയറ്റ് അവസരത്തിനൊത്ത് ഉയര്ന്നില്ലെന്ന് ആക്ഷേപമുണ്ടായി.
പലപ്പോഴും ഉപസമിതി യോഗം ചേര്ന്നത് തിടുക്കത്തിലായിരുന്നുവെന്ന് ബിനോയ് വിശ്വം ചൂണ്ടിക്കാട്ടി. എല്ലാ യോഗങ്ങളില് തനിക്ക് പങ്കെടുക്കാന് കഴിഞ്ഞില്ലെന്നും തന്റെ അഭിപ്രായവ്യത്യസം ഉപസമിതി ചര്ച്ചകളില് രേഖാമൂലം പ്രകടിപ്പിച്ചിട്ടുണ്ടെന്നും അദ്ദേഹം വ്യക്തമാക്കി.
സ്വാശ്രയ പ്രൊഫഷണല് കോളെജുകളിലെ പ്രവേശനം, ഫീസ് എന്നിവ നിയന്ത്രിക്കുന്നതിനു പുതിയ നിയമം വേണമെന്ന നിലപാട് മാറ്റേണ്ടതില്ലെന്നും യോഗം തീരുമാനിച്ചു. ഇടതുമുന്നണിയുടെ പ്രഖ്യാപിത നയത്തിന് വിരുദ്ധണാണ് സ്വാശ്രയ കരാര് എന്നിരിക്കേ ഇക്കാര്യത്തില് കര്ശന നിലപാട് വേണം പാര്ട്ടി സ്വീകരിക്കാന് എന്ന അഭിപ്രായമാണ് യോഗത്തില് ഉയര്ന്നത്.