വൈദികന്റെ മൃതദേഹത്തില് വീണ്ടും പോസ്റ്റ്മോര്ട്ടം
കണ്ണൂര്: മംഗലാപുരത്തിനടുത്ത് ദുരൂഹ സാഹചര്യത്തില് കൊല്ലപ്പെട്ട നിലയില് കണ്ടെത്തിയ മലയാളി വൈദികന് ഫാദര് ജെയിംസ് മുകുളേലിന്റെ സംസ്ക്കാരം മാറ്റിവെച്ചു.
സംസ്ക്കാരത്തിനായി പള്ളിയിലേക്ക് കൊണ്ടുപോയ മൃതദേഹം രണ്ടാമതും പോസ്റ്റ്മോര്ട്ടം ചെയ്യാന് ബന്ധുക്കള് ആവശ്യപ്പെടുകയായിരുന്നു. ഇതേ തുടര്ന്ന് ശനിയാഴ്ച നടത്താനിരുന്ന സംസ്ക്കാരം മാറ്റിവെച്ച് മൃതദേഹം പോസ്റ്റ്മോര്ട്ടത്തിനായി കോഴിക്കോട് മെഡിക്കല് കോളേജ് ആസ്പത്രിയിലേക്ക് കൊണ്ടു പോവുകയായിരുന്നു.
മംഗലാപുരം വെന്ലോക് ജില്ലാ ആസ്പത്രിയില് വ്യാഴാഴ്ച പോസ്റ്റ്മോര്ട്ടം നടത്തിയിരുന്നുവെങ്കിലും മരണകാരണം കണ്ടെത്താനാവാത്തതിനാലാണ് കേരളത്തില് വീണ്ടും പോസ്റ്റ്മോര്ട്ടം ചെയ്യണമെന്ന് ബന്ധുക്കള് ആവശ്യപ്പെട്ടത്.
ബല്ത്തങ്ങാടി രൂപതയില് നെല്യാടിക്കടുത്ത കുട്രപ്പാടി സെന്റ് മേരീസ് പള്ളിയിലെ വികാരിയായിരുന്നു ഫാദര് ജയിംസ് മുകുളേല്. കുത്തിരിച്ചാലില് നിന്ന് കുണ്ടാടിക്കുള്ള നാട്ടുപാതയില് വ്യാഴാഴ്ച രാവിലെ 7.10 നാണ് വൈദികന്റെ മൃതദേഹം നഗ്നമായനിലയില് കണ്ടത്.
കുട്രപ്പാടി പള്ളിയിലെ വികാരിയായ ഫാദര് ജയിംസ് ചാര്മാഡി കോരങ്കോട് മാത്യുവിന്റെ അന്ത്യകൂദാശയില് പങ്കെടുക്കാനാണ് ബുധനാഴ്ച തോട്ടത്താടിയില് വന്നത്. ശവസംസ്കാര ചടങ്ങില് പങ്കെടുത്ത് രാത്രി ഒന്പതരയ്ക്ക് ബൈക്കില് മടങ്ങിയ ഫാദര് ജയിംസിനെ രാവിലെ മരിച്ച നിലയില് കണ്ടെത്തുകയായിരുന്നു.