വൈദികന്റെ മരണം: ക്വട്ടേഷന് സംഘമെന്ന് സംശയം
കണ്ണൂര്: ബല്ത്തങ്ങാടിക്കടുത്ത് കുട്ടൂര്പാടിയില് കൊലചെയ്യപ്പെട്ട ഫാദര് ജെയിംസ് മുകളേലി(38) ന്റെ കൊലപാതകത്തിനു പിന്നില് ക്വട്ടേഷന് സംഘമാണെന്ന് സംശയം.
ബന്ധുക്കളുടെ ആവശ്യപ്രകാരം മൃതദേഹം വെള്ളിയാഴ്ച സംസ്കരിക്കുന്നതിനു മുമ്പായി രണ്ടാമതും പോസ്റ്റുമോര്ട്ടം നടത്തിയിരുന്നു. മൃതദേഹത്തില് മാരകമായ മുറിപ്പാടുകളോ ചതവോ ഒന്നും കണ്ടെത്തിയിരുന്നില്ല.
ബുധനാഴ്ച ഉച്ചതിരിഞ്ഞ് ഒരു ശവസംസ്കാര ശുശ്രൂഷയില് സംബന്ധിച്ചശേഷം രാത്രി എട്ടരയോടെ ഭക്ഷണം കഴിക്കാനായി അടുത്തുള്ള ചാര്മാഡി സെന്റ് എലിസബത്ത് കോണ്വെന്റില് അദ്ദേഹം എത്തിയിരുന്നു. ഭക്ഷണം കഴിക്കുന്നതിനിടെ മൊബൈല് ഫോണില് ഒരു വിളി വന്നതോടെ അസ്വസ്ഥനായി കാണപ്പെട്ട അദ്ദേഹം വൈകാതെ അറുപത് കിലോമീറ്റര് അകലെയുള്ള കുട്ടൂര്പാടിയിലേക്ക് ബൈക്കില് മടങ്ങുകയായിരുന്നു.
പിറ്റേന്ന് രാവിലെ ഏഴുമണിയോടെയാണ് പ്രധാന റോഡില് നിന്ന് രണ്ടു കിലോമീറ്റര് ഉള്ളിലായി ഫാദര് ജെയിംസിന്റെ മൃതദേഹം നഗ്നമായ നിലയില് കണ്ടെത്തിയത്. മറ്റെവിടെയോവച്ച് കൊലപ്പെടുത്തിയ ശേഷം ആള്പ്പെരുമാറ്റം കുറഞ്ഞ സ്ഥലത്ത് മൃതദേഹം കൊണ്ടിടുകയായിരുന്നുവെന്നാണ് പോലീസിന്റെ നിഗമനം. മരണത്തില് ദുരൂഹതയുണ്ടെന്ന് ബന്ധുക്കള് പരാതിപ്പെട്ടതിനെ തുടര്ന്നാണ് സംസ്ക്കാരത്തിനായി പള്ളിയിലേക്ക് കൊണ്ടു പോയ മൃതദേഹം വീണ്ടും പോസ്റ്റ്മോര്ട്ടത്തിന് വിധേയമാക്കിയത്.