ചെറിയതുറ: കെ.രാമകൃഷ്ണന് അന്വേഷണ കമ്മിഷന്
തിരുവനന്തപുരം: ചെറിയതുറ പൊലീസ് വെടിവയ്പ്പിനെക്കുറിച്ച് അന്വേഷണം നടത്തി റിപ്പോര്ട്ട് സമര്പ്പിക്കാന് തിരുവനന്തപുരം ജില്ലാ സെഷന്സ് ജഡ്ജി കെ രാമകൃഷ്ണന്റെ നേതൃത്വത്തിലുളള ജൂഡീഷ്യല് കമ്മീഷനെ സര്ക്കാര് നിയോഗിച്ചു. സംഭവത്തെ കുറിച്ച് അന്വേഷിക്കുന്നതിന് സിറ്റിങ് ജഡ്ജിയുടെ സേവനം സര്ക്കാര് ആവശ്യപ്പെട്ടിരുന്നു. ഇതനുസരിച്ച് ഹൈക്കോടതി നിര്ദേശ പ്രകാരമാണ് കമ്മിഷനെ നിയോഗിച്ചതെന്ന് മുഖ്യമന്ത്രി അറിയിച്ചു.
വെടിവയ്പ്പിനിടയായ സാഹചര്യവും പോലീസുകാരുടെ പങ്കുമായിരിക്കും കമ്മീഷന് അന്വേഷിക്കുക. ആറു മാസമായിരിക്കും കമ്മീഷന്റെ കാലാവധിയെന്ന് മന്ത്രിസഭാ തീരുമാനങ്ങള് വിശദീകരിച്ച് മുഖ്യമന്ത്രി വിഎസ് അച്യുതാനന്ദന് പറഞ്ഞു.
പൊതുമേഖലാ സ്ഥാപനങ്ങളിലെ ജീവനക്കാരുടെ ബോണസ് മുന്വര്ഷത്തേപോലെ തന്നെ നല്കും. പൂട്ടിക്കിടക്കുന്ന വ്യവസായ സ്ഥാപനങ്ങളിലെ ജീവനക്കാര്ക്കും ഉത്സവബത്ത നല്കും. ഗ്രാമീണ തൊഴിലുറപ്പ് പദ്ധതി നടത്തിപ്പിനായി ജില്ലാ, ബ്ലോക്ക്, ഗ്രാമപഞ്ചായത് തലത്തില് പൂര്ണ സമയ നിര്വഹണ ഉദ്യോഗസ്ഥരെ നിയമിക്കും. ഇതിനായി എന്ജിനീയര്മാര് അടക്കം 1627 തസ്തികള് സൃഷ്ടിക്കുമെന്ന് മുഖ്യമന്ത്രി അറിയിച്ചു.