എണ്ണ ഖനനം: 500 അടിയില് താഴെയെത്തി
കൊച്ചി: എണ്ണ നിക്ഷേപം തേടി കൊച്ചി തീരത്തെ ആഴക്കടലില് ഒഎന്ജിസി നടത്തുന്ന ഖനനം 500 അടിയില് താഴെയെത്തി. പാറയുടെ സാന്നിധ്യം കണ്ടു തുടങ്ങിയെന്നും എന്നാല് ഇത് ഖനനത്തിനു തടസ്സമാകില്ലെന്നും അധികൃതര് സൂചിപ്പിച്ചു. 21 ഇഞ്ച് വ്യാസമുള്ള ഉരുക്കു പൈപ്പ് കിണറിലേക്ക് ഇറക്കിയാണ് കടല് കുഴിക്കുന്നത്.
അതേ സമയം ഖനനം ആയിരം മീറ്ററെങ്കിലും പിന്നിട്ടാലെ എണ്ണ നിക്ഷേപം സംബന്ധിച്ചു കാര്യമായ സൂചനകള് ലഭിച്ചു തുടങ്ങുകയുള്ളൂ എന്നാണ് വിലയിരുത്തല്. ആഴം കുറഞ്ഞ കടലില് മുന്പ് നടത്തിയ ഖനനത്തില് എണ്ണയുടേയും പ്രകൃതി വാതകത്തിന്റേയും സാന്നിധ്യം കണ്ടെത്തിയത് ആയിരം മീറ്ററിനു താഴെയായിരുന്നു.
കൊച്ചി തീരത്തുനിന്ന് 70 നോട്ടിക്കല് മൈല് (129.5 കിലോമീറ്റര്) അകലെയായി കഴിഞ്ഞ രണ്ടാം തീയതി മുതലാണ് അത്യാധുനിക റിഗ് ഉപയോഗിച്ചുള്ള ഖനനം ആരംഭിച്ചത്. കൊച്ചി തീരത്ത് എണ്ണ നിക്ഷേപം ഉണ്ടോയെന്ന കാര്യം 100 ദിവസത്തിനുള്ളില് അറിയാമെന്നാണ് ഒഎന്ജിസി അധികൃതര് അറിയിച്ചിരിയ്ക്കുന്നത്.