ആന്‍ഡമാന്‌ സമീപം ഭൂകമ്പം

ചെന്നൈ: ആന്‍ഡമാന്‍ ദ്വീപിനു സമീപം ഇന്ത്യന്‍ മഹാസമുദ്രത്തില്‍ ശക്തിയേറിയ ഭൂകമ്പം. റിച്ചര്‍ സ്‌കെയിലില്‍ 7.6 രേഖപ്പെടുത്തിയ ഭൂകമ്പത്തെ തുടര്‍ന്ന്‌ ഇന്ത്യ, ശ്രീലങ്ക, മ്യാന്‍മാര്‍, ഇന്തോനേഷ്യ, തായ്‌ലാന്‍ഡ്‌, ബംഗ്ലാദേശ്‌ ജപ്പാന്‍ എന്നീ ഏഴു രാജ്യങ്ങളില്‍ നല്‍കിയ സുനാമി മുന്നറിയിപ്പ്‌ പസഫിക്‌ സുനാമി വാണിങ്‌ സെന്റര്‍ പിന്‍വലിച്ചു.

പുലര്‍ച്ചെ 1.26നാണ്‌ ഭൂകമ്പമുണ്ടായത്‌. പോര്‍ട്ട്‌ ബ്ലെയറിന്‌ വടക്ക്‌ 300 കിലോമീറ്റര്‍ അകലെയാണ്‌ ഭൂചലനത്തിന്റെ പ്രഭവ കേന്ദ്രം. ചെന്നൈ, ഭുവനേശ്വര്‍ എന്നിവിടങ്ങളിലും ഭൂകമ്പം അനുഭവപ്പെട്ടതായി റിപ്പോര്‍ട്ടുകളുണ്ട്‌. ഭൂകമ്പത്തിന്‌ മൂന്ന്‌ മണിക്കൂറിന്‌ ശേഷമാണ്‌ സൂനാമി മുന്നറിയിപ്പ്‌ പിന്‍വലിച്ചത്‌. ഭൂകമ്പത്തില്‍ ആളപായമുണ്ടായതായി റിപ്പോര്‍ട്ടില്ല.

ആന്‍ഡമാനു സമീപമുണ്ടായ ഭൂചലനത്തിന്‌ 12 മിനിറ്റിന്‌ ശേഷം ജപ്പാന്‍ തീരത്ത്‌ തുടര്‍ ചലനമുണ്ടായി. 6.4 രേഖപ്പെടുത്തിയ ഭൂചലനം ജപ്പാനിലെ ഹോന്‍ഷുവിനു തെക്കു തീരത്താണുണ്ടായത്‌. ഇവിടെ 60 പേര്‍ക്ക്‌ പരിക്കേറ്റതായാണ്‌ പ്രാഥമിക റിപ്പോര്‍ട്ട്‌. ആളപായമൊന്നും റിപ്പോര്‍ട്ട്‌ ചെയ്‌തിട്ടില്ല.