അതിവേഗ പാത : സാധ്യതാ പഠനം നടത്തും
തിരുവനന്തപുരം: കഴിഞ്ഞ യുഡിഎഫ് സര്ക്കാരിന്റെ കാലത്ത് ആവിഷ്കരിച്ച എക്സ്പ്രസ് ഹൈവേ പ്രായോഗികമല്ലെന്ന് പൊതുമരാമത്ത് മന്ത്രി മോന്സ് ജോസഫ്.
മുന് സര്ക്കാര് ഇതിന്റെ സാധ്യതാ പഠനം നടത്തിയിട്ടില്ലെന്നും, അലൈന്മെന്റ് പഠനം മാത്രമാണ് നടത്തിയതെന്നും സമഗ്ര റോഡ് വികസന നയം പുറത്തിറക്കിക്കൊണ്ട് മോന്സ് തിരുവനന്തപുരത്ത് വാര്ത്താ സമ്മേളനത്തില് പറഞ്ഞു.
100 മീറ്റര് വീതിയില് തിരുവനന്തപുരം മുതല് കാസര്കോട് വരെ എക്സ്പ്രസ് ഹൈവേ നിര്മ്മിക്കാനാണ് യുഡിഎഫ് സര്ക്കാരിന്റെ പദ്ധതി. അതേ സമയം സംസ്ഥാനത്തെ ദേശീയപാതകളുടെ ഇപ്പോഴത്തെ വീതി 45 മീറ്ററാണ്. അതു തന്നെ ഇനിയും കുറയ്ക്കണമെന്ന് ആവശ്യമുയര്ന്നിരിയ്ക്കുന്നതെന്ന് മന്ത്രി പറഞ്ഞു.
ഈ സാഹചര്യത്തില് 45മീറ്റര് വീതിയില് തെക്ക്-വടക്ക് അതിവേഗ പാത ആരംഭിക്കുന്നതിന് സാധ്യതാ പഠനം നടത്തും. സാധ്യതാ പഠനത്തിന് ശേഷം ഇക്കാര്യത്തില് അഭിപ്രായ സമന്വയത്തിന് സര്വകക്ഷി യോഗം വിളിക്കുമെന്നും മന്ത്രി അറിയിച്ചു.