ഹോട്ടലില് നായയിറച്ചി വിളമ്പുന്നുവെന്ന് പരാതി
ചെന്നൈ: കൊറിയക്കാര് നടത്തുന്ന റസ്റ്റോറന്റില് നായയിറച്ചി വില്ക്കുന്നതായി പരാതി. ചെന്നൈയിലെ രാജാ അണ്ണാമലൈപുരത്ത് പ്രവര്ത്തിക്കുന്ന അനധികൃത റസ്റ്റോറന്റില് നായയിറച്ചി വില്ക്കുന്നതായി മൈലാപൂര് എംഎല്എ എസ് വി ശേഖര് ആണ് സിറ്റി പൊലീസ് കമ്മീഷണര്ക്ക് പരാതി നല്കിയിരിക്കുന്നത്.
റസ്റ്റോറന്റില് നിന്നും ഒരു പ്രത്യേക തരം മണം വരുന്നുണ്ടെന്നും ഒരുപക്ഷേ നായയിറച്ചി വേവിക്കുന്നതുകൊണ്ടാകാമെന്നും സമീപവാസികളാണ് തന്നോട് പറഞ്ഞതെന്ന് എംഎല്എയുടെ പരാതിയില് പറയുന്നു.
പരിസരവാസികളില് പലരും പറയുന്നത് ഇവിടെ നായയിറച്ചി വില്ക്കുന്നുണ്ടെന്നാണ്. കസ്തൂരി അവന്യൂവില് താമസിക്കുന്നവരാണത്രേ പരാതിയുമായി എംഎല്എയെ സമീപിച്ചത്. ഇതിനെത്തുടര്ന്നാണ് എംഎല്എ പൊലീസിന്റെ സഹായം തേടിയത്.
ഒരു സ്വകാര്യ ഗസ്റ്റ് ഹൗസിലാണ് കൊറിയക്കാരുടെ റസ്റ്റോറന്റ് പ്രവര്ത്തിക്കുന്നത്. ഇവിടെ ഭക്ഷണം കഴിക്കാനെത്തുന്ന ആളുകളുടെ കാറുകള് നിരനിരയായി പാര്ക്ക് ചെയ്യുന്നത് തങ്ങള്ക്ക് അസൗകര്യമുണ്ടാക്കുന്നുവെന്ന് താമസക്കാര് പരാതിപ്പെട്ടിരുന്നു. തുടര്ന്ന്് ആളുകള് തൊട്ടപ്പുറത്തുള്ള ക്ഷേത്രത്തിന് സമീപത്ത് വാഹനം പാര്ക്കു ചെയ്യുക പതിവാക്കി.
കഴിഞ്ഞ കുറേ മാസങ്ങളായി രാത്രി വൈകുംവരെ റസ്റ്റോറന്റില് നിന്നും അസഹനീയമായ ഗന്ധം വരുന്നുണ്ടെന്നാണ് ജനങ്ങള് പറയുന്നത്. പൊലീസിനാണ് പരാതി നല്കിയിരിക്കുന്നതെങ്കിലും ഇക്കാര്യത്തില് എന്തെങ്കിലും ചെയ്യാന് കഴിയുന്നത് കോര്പ്പറേഷന് അധികൃതര്ക്ക് മാത്രമാണെന്നാണ് പൊലീസ് പറയുന്നത്.
റസ്റ്റോറന്റുകള്ക്ക് ലൈസന്സ് നല്കുന്നത് കോര്പ്പറേഷനാണ്. മാത്രമല്ല ഇതൊരു ക്രിമിനല് സ്വഭാവമുള്ള കേസ് അല്ലെന്നും പൊലീസ് പറയുന്നു.
പക്ഷേ ഗസ്റ്റ് ഹൗസില് താമസിക്കുന്നവരോട് വിവരം അന്വേഷിക്കാമെന്നും റസ്ററോറന്റ് നടത്തിപ്പുകാരെ ചോദ്യം ചെയ്യാമെന്നും പൊലീസ് എംഎല്എയ്ക്ക് ഉറപ്പ് നല്കിയിട്ടുണ്ട്