മന്ത്രി മോന്‍സ്‌ ഞായറാഴ്‌ച രാജിവെയ്‌ക്കും

തിരുവനന്തപുരം: പൊതുമരാമത്ത്‌ വകുപ്പ്‌ മന്ത്രി മോന്‍സ്‌ ജോസഫ്‌ ഞായറാഴ്‌ച രാജിവെയ്‌ക്കും. രാജിക്കത്ത്‌ ക്ലിഫ്‌ ഹൗസിലെത്തി മുഖ്യമന്ത്രിയ്‌ക്ക്‌ കൈമാറുമെന്ന്‌ അദ്ദേഹം പറഞ്ഞു.

ശനിയാഴ്‌ചത്തെ സ്വാതന്ത്ര്യദിനാഘോഷത്തില്‍ കോട്ടയം ജില്ലയിലെ ചടങ്ങില്‍ മുഖ്യാതിഥിയായി പങ്കെടുത്തതാണ്‌ മന്ത്രിയെന്ന നിലയില്‍ അദ്ദേഹത്തിന്റെ അവസാന ഔദ്യോഗിക ചടങ്ങ്‌.

ജോസഫ്‌ ഗ്രൂപ്പിന്റെ മന്ത്രിയായി പിജെ ജോസഫിനെ തീരുമാനിച്ച സാഹചര്യത്തിലാണ്‌ മോന്‍സ്‌ ജോസഫിന്റെ രാജി. വിമാനയാത്രാ കേസില്‍ കുറ്റവിമുക്തനാക്കിയതിനെത്തുടര്‍ന്നാണ്‌ കേരള കോണ്‍ഗ്രസ്‌ ജോസഫ്‌ ഗ്രൂപ്പ്‌ ചെയര്‍മാന്‍ പിജെ ജോസഫ്‌ മന്ത്രിസ്ഥാനത്ത്‌ തിരിച്ചെത്തുന്നത്‌.

സ്‌ഥാനമൊഴിയുന്നതിന്‌ മുന്നോടിയായി വെള്ളിയാഴ്‌ച വകുപ്പിലെ ഉന്നതോദ്യോഗസ്ഥരേയും ചീഫ്‌ എന്‍ജിനീയര്‍മാരെയും മറ്റും മന്ത്രി സെക്രട്ടേറിയറ്റിലെ ഓഫീസിലേക്ക്‌ വിളിച്ച്‌ സംസാരിച്ചു. വകുപ്പിന്റെ പ്രവര്‍ത്തനം മുന്നോട്ടുകൊണ്ടുപോകുന്നതിന്‌ നല്‍കിയ സഹകരണത്തിന്‌ മോന്‍സ്‌ സഹപ്രവര്‍ത്തകര്‍ക്ക്‌ നന്ദി പറഞ്ഞു.

പിഡബ്ല്യുഡി സെക്രട്ടറി ടോം ജോസുമായി സംസാരിച്ച്‌ തീരുമാനമെടുക്കാനുള്ള ഫയലുകളില്‍ തീര്‍പ്പ്‌ വരുത്തി. ശനിയാഴ്‌ച്ച സ്വാതന്ത്ര്യദിന ചടങ്ങുകളില്‍ പങ്കെടുത്തശേഷം വിവിധ ദേവാലയങ്ങള്‍ സന്ദര്‍ശിച്ചു.