മോഹനരര് ശബരിമലയില്; ദേവസ്വത്തിന് അതൃപ്തി
ശബരിമല: ശബരിമല തന്ത്രി സ്ഥാനം ഏറ്റെടുക്കാന് സന്നിധാനത്തെത്തിയ കണ്ഠരര് മഹേശ്വരരും ദേവസ്വം അധികൃതരും തമ്മില് തര്ക്കം. മഹേശ്വരര്ക്കൊപ്പം ക്രിമിനല് കേസുകളില് ഉള്പ്പെട്ട കണ്ഠരര് മോഹനരര് എത്തിയതിനെ അധികൃതര് ചോദ്യം ചെയ്തതാണ് തര്ക്കത്തിനിടയാക്കിയത്.
കണ്ഠരര് മോഹനരരെ ശ്രീകോവിലില് പ്രവേശിപ്പിക്കരുതെന്നും പൂജാ വിധികളില് പങ്കെടുപ്പിക്കരുതെന്നും ദേവസ്വം ബോര്ഡ് അധികൃതര് നിര്ദ്ദേശിച്ചു. എന്നാല് മോഹനരര്ക്ക് ദര്ശനം നടത്താന് ദേവസ്വം അധികൃതര് അനുവാദം നല്കി.
ക്രിമിനല് കേസില് ഉള്പ്പെട്ടതിനെ തുടര്ന്ന് കണ്ഠരര് മോഹനരരെ തന്ത്രിസ്ഥാനം ഏറ്റെടുക്കുന്നതില് നിന്ന് നേരത്തെ വിലക്കേര്പ്പെടുത്തിയിരുന്നു.
ചിങ്ങമാസ പൂജകള്ക്കായി ശബരിമല ക്ഷേത്രം ഞായറാഴ്ച തുറക്കും. 21 വരെ പൂജകള് ഉണ്ടാകും. തന്ത്രി കണ്ഠരര് മഹേശ്വരരുടെ സാന്നിധ്യത്തില് മേല്ശാന്തി എന് വിഷ്ണു നമ്പൂതിരി ആണ് നട തുറക്കുന്നത്.