പരാജയകാരണം അദ്വാനിയും വരുണും: ബിജെപി

സിംല: ലോക്‌സഭാ തിരഞ്ഞെടുപ്പില്‍ ബിജെപി പരാജയപ്പെടാന്‍ എല്‍കെ അദ്വാനി മുതല്‍ യുവനേതാവായ വരുണ്‍ ഗാന്ധിവരെയുള്ളവര്‍ കാരണമായെന്ന്‌ റിപ്പോര്‍ട്ട്‌.

സിംലയില്‍ നടക്കുന്ന ചിന്തന്‍ ബൈഠകില്‍ അവതരിപ്പിച്ച അവലോകന രേഖയിലാണ്‌ അദ്വാനിയും വരുണും ഉള്‍പ്പെടെയുള്ളവര്‍ക്കെതിരെ രൂക്ഷവിമര്‍ശനം ഉയര്‍ന്നത്‌.

അദ്വാനി പ്രധാനമന്ത്രി മന്‍മോഹന്‍ സിങിനെതിരെ നടത്തിയ രൂക്ഷമായ പരാമര്‍ശങ്ങള്‍ ജനങ്ങള്‍ക്ക്‌ രസിച്ചില്ലെന്നും അത്‌ തിരഞ്ഞെടുപ്പ്‌ പരാജയത്തിന്‌ വഴിയൊരുക്കിയെന്നും രേഖയില്‍ പറയുന്നു.

നരേന്ദ്രമോഡിയെ ഉയര്‍ത്തിക്കാട്ടി തിരഞ്ഞെടുപ്പിനെ നേരിട്ടതും പരാജയകാരണമായി. വരുണിന്റെ പക്വതയില്ലാത്ത വര്‍ഗീയ പ്രസംഗവും തുടര്‍ന്നുള്ള സംഭവവും പരാജയത്തിന്‌ മറ്റൊരു കാരണമായി- രേഖയില്‍ പറയുന്നു.

തിരഞ്ഞെടുപ്പ്‌ കാലത്ത്‌ ഈ നേതാക്കളുടെയൊക്കെ പ്രകനടത്തെ ശരിവച്ച ബിജെപിയില്‍ പിന്നീട്‌ ഇതിന്റെ പേരില്‍ രൂക്ഷമായ ആഭ്യന്തര പ്രശ്‌നങ്ങളും അഭിപ്രായവ്യത്യാസങ്ങളും ഉണ്ടായിരുന്നു. അരുണ്‍ ജെയ്‌റ്റ്‌ലി, യശ്വന്ത്‌ സിന്‍ഹ തുടങ്ങിയവരുടെ രാജിവരെ കാര്യങ്ങളെത്തി.

നേതൃനിരയില്‍ ഐക്യമുണ്ടായില്ല. പല സംസ്ഥാനങ്ങളിലും സഖ്യങ്ങള്‍ ദുര്‍ബലമായിരുന്നു. മാത്രമല്ല ഇവിടങ്ങളിലൊക്കെ തിരഞ്ഞെടുപ്പിന്‌ മുമ്പേ തോല്‍ക്കുന്ന സ്ഥിതിയായിരുന്നു. മുംബൈ ആക്രമണത്തെ മുന്‍നിര്‍ത്തി കോണ്‍ഗ്രസിനെ പ്രതിക്കൂട്ടിലാക്കാന്‍ കഴിഞ്ഞില്ല- എന്നിങ്ങനെയാണ്‌ രേഖയിലെ വിമര്‍ശനങ്ങള്‍. എന്നാല്‍ ഇത്തരത്തിലൊരു റിപ്പോര്‍ട്ട്‌ ചിന്തന്‍ ബൈഠക്കില്‍ അവതരിപ്പിച്ചിട്ടില്ലെന്നാണ്‌ പാര്‍ട്ടി വൃത്തങ്ങള്‍ പറയുന്നത്‌.