വിദ്യാര്‍ത്ഥിയുടെ ബാഗില്‍ സ്ഫോടകവസ്തു

കോട്ടയം: വിദ്യാര്‍ഥിയുടെ ബാഗില്‍ നിന്നും എട്ട് ഡിറ്റണേറ്റര്‍ കണ്ടെത്തി. ഉഴവൂര്‍ സെന്റ് ജൊവാന്‍ സ്‌കൂളിലെ രണ്ടാം ക്ലാസ് വിദ്യാര്‍ത്ഥിയായ അതുല്‍ സന്തോഷിന്‍റെ ബാഗില്‍ നിന്നാണ് ഏഴ് സാധാരണ ഡിറ്റണേറ്ററുകളും ഒരു ഇലക്ട്രിക് ഡിറ്റൊണേറ്ററും കണ്ടെത്തിയത്.

തുര്‍ടന്നു നടത്തിയ തിരച്ചിലില്‍ ക്ലാസ് മുറിയില്‍ നിന്നും മറ്റൊരു ഡിറ്റണേറ്റര്‍ കണ്ടെത്തി. സ്‌കൂളിലെ ചവറ്റുകൊട്ടയില്‍ നിന്നു ലഭിച്ചതാണിവയെന്ന് കുട്ടി പറഞ്ഞു.

വെള്ളിയാഴ്ച വൈകീട്ടാണ് ഡിറ്റണേറ്റര്‍ കണ്ടെത്തിയത്. തുടര്‍ന്ന് രാത്രി കുറവിലങ്ങാട് പോലീസെത്തി സ്‌കൂളില്‍ പരിശോധന നടത്തി. ശനിയാഴ്ച രാവിലെയാണ് ജനങ്ങള്‍ വിവരമറിയുന്നത്.

ഒരു മാസം മുന്‍പ് ഈ സ്കൂളിന് സമീപത്തുള്ള ഒരു വീട്ടില്‍ നിന്ന് മുപ്പതിലേറെ ഡിറ്റണേറ്ററുകള്‍ കണ്ടെത്തിയിരുന്നു.

പാടശേഖരത്തെ പാറ പൊട്ടിക്കാന്‍ കൊണ്ടുവന്നതാണെന്നായിരുന്നു അറസ്റ്റിലായ വീട്ടുടമസ്ഥന്‍ നല്‍കിയ മൊഴി. ഒരു വര്‍ഷം മുന്‍പ് വീട്ടുമുറ്റത്തു നിന്നു ലഭിച്ച തോട്ട കടിച്ചു ഒരു പിഞ്ചു കുഞ്ഞ് മരിച്ച സംഭവവും ഉണ്ടായിരുന്നു.