സുധീന്ദ്ര കുല്ക്കര്ണി ബിജെപി വിട്ടു
പ്രമുഖ നേതാവ് ജസ്വന്ത് സിങിനെ പുറത്താക്കിയതിന് പിന്നാലെ പാര്ട്ടിയെ ഞെട്ടിച്ചുകൊണ്ടാണ് കുല്ക്കര്ണിയുടെ രാജി. എന്നാല് തന്റെ രാജിക്ക് ജസ്വന്തിന്റെ പുറത്താക്കലുമായി ബന്ധമില്ലന്നും പാര്ട്ടിയുമായി തനിക്കുള്ള അഭിപ്രായ വ്യത്യാസം എന്താണന്ന് ഇപ്പോള് വിശദീകരിക്കാനാവില്ലന്നും അദ്ദേഹം വ്യക്തമാക്കി.
എന്നാല് ജസ്വന്തിന്റെ പുസ്തകത്തിലെ ജിന്നാ പരാമര്ശം തെറ്റായാണ് വായിക്കപ്പെട്ടതെന്നും ഇത്ര വലിയ ജനാധിപത്യ രാജ്യത്തിലെ രാഷ്ട്രീയ പാര്ട്ടികള്ക്കുള്ളിലും ജനാധിപത്യം ആവശ്യമാണന്നും അദ്ദേഹം വ്യക്തമാക്കി.
2005 ല് അദ്വാനിയുടെ ജിന്നാ പരാമര്ശത്തെത്തുടര്ന്നുണ്ടായ സംഭവവികാസങ്ങളില് കുല്ക്കര്ണി പാര്ട്ടിയുടെ ഔദ്യോഗിക സ്ഥാനങ്ങളില് നിന്ന് രാജിവെച്ചിരുന്നു. 13 വര്ഷമായി ബിജെപിയില് സജീവമായി പ്രവര്ത്തിക്കുന്ന കുല്ക്കര്ണി ദേശീയതലത്തില് പാര്ട്ടിയെ ശക്തിപ്പെടുത്തുന്നതില് പ്രധാന പങ്ക് വഹിച്ചയാളാണ്.
വാജ് പേയി പ്രധാനമന്ത്രിയായിരുന്ന സമയത്ത് അദ്ദേഹത്തിന്റെ പ്രസംഗം എഴുത്തുകാരനും മാധ്യമ ഉപദേഷ്ടാവുമായിരുന്നു കുല്ക്കര്ണി. കഴിഞ്ഞ ലോക്സഭാ തിരഞ്ഞെടുപ്പില് അദ്വാനിയുടെ പ്രചാരണത്തിന് ചുക്കാന് പിടിച്ചതും കുല്ക്കര്ണിയായിരുന്നു.