എച്ച്ഐവി ബാധിതനെ സ്കൂളില് നിന്നും പുറത്താക്കി
അലഹബാദ്: അച്ച്ഐവി ബാധിതനായ വിദ്യാര്ത്ഥിയെയും സഹോദരങ്ങളെയും സ്കൂളില് നിന്നും പുറത്താക്കി.
അലഹബാദ് ജില്ലയിലെ ഒരു ഗ്രാമത്തിലെ സ്കൂളിലാണ് സംഭവം നടന്നത്. അന്ഷുവെന്ന വിദ്യാര്ത്ഥിയെയും സഹോദരിയെയും സഹോദരനെയുമാണ് സ്കൂളില് നിന്നും പുറത്താക്കിയത്.
നാട്ടുകാരുടെ സമ്മര്ദ്ദത്തെത്തുടര്ന്ന് സ്കൂളിലെ പ്രധാനാധ്യാപകനാണ് വിദ്യാര്ത്ഥികളെ പുറത്താക്കിയത്. സംഭവം വാര്ത്തയായതിനെത്തുടര്ന്ന് പ്രധാനാധ്യാപകനെതിരെ നടപടി സ്വീകരിക്കാന് ജില്ലാ പ്രാഥമിക വിദ്യാഭ്യാസ ഓഫീസര് തീരുമാനിച്ചു.
കുട്ടികളുടെ പിതാവ് എച്ച്ഐവി ബാധയെത്തുടര്ന്ന് 2005ല് തന്റെ മുപ്പത്തിയഞ്ചാമത്തെ വയസ്സിലാണ് മരിച്ചത്. ഇതേവര്ഷം തന്നെ എയ്ഡ്സ് ബാധിച്ച് മാതാവും മരിച്ചു. മൂന്നാമത്തെ കുഞ്ഞിന് ജന്മം നല്കിയ ഉടനെയായിരുന്നു മാതാവിന്റെ മരണം.
ഇതോടെ കുട്ടികള് തീര്ത്തും അനാഥരായി. മൂന്നാമത്തെ കുട്ടിയ്ക്ക് ഇപ്പോള് നാല് വയസ്സായി. അന്ഷുവിന്റെ മൂത്തസഹോദരിയ്ക്ക് ഏഴ്് വയസ്സുണ്ട്.
മാതാപിതാക്കള് മരിച്ചതിനെത്തുടര്ന്ന് കുട്ടികള് അമ്മാവന്റെ സംരക്ഷണത്തിലാണ്. ഇദ്ദേഹമാണ് കുട്ടികളെ സ്കൂളില് ചേര്ത്ത് പഠിപ്പിക്കുന്നതും.
കുട്ടികളെ എച്ച്ഐവി പരിശോധനയ്ക്ക് വിധേയരാക്കിയപ്പോള് അന്ഷു എച്ച്ഐവി പൊസീറ്റീവ് ആണെന്ന് വ്യക്തമായിരുന്നു.
ഇക്കാര്യം അറിഞ്ഞതോടെ അന്ഷു പഠിക്കുന്ന സ്കൂളിലേയ്ക്ക് മക്കളെ അയക്കാന് ഗ്രാമീണര് വിസമ്മതിച്ചു. ഇതിനെത്തുടര്ന്നാണ് പ്രധാനാധ്യാപകന് കുട്ടികളെ പുറത്താക്കിയത്.