രാഹുലിന്റെ പേരില് വ്യാജ ലൈസന്സ്
പട്ന: സച്ചിന്റെയും സാനിയയുടെയും വ്യാജ റേഷന് കാര്ഡുകള്ക്ക് പിന്നാലെ കോണ്ഗ്രസ് ജനറല് സെക്രട്ടറി രാഹുല് ഗാന്ധിയുടെ പേരിലുള്ള വ്യാജ ലൈസന്സും വാര്ത്തകളില് ഇടം പിടിയ്ക്കുന്നു. കായിക താരങ്ങളുടെ പേരിലുള്ള റേഷന് കാര്ഡുകള് നല്കിയത് ആന്ധ്രയിലാണെങ്കില് രാഹുലിന്റെ വ്യാജ ഡ്രൈവിംങ് ലൈസന്സ് ബീഹാറില് സരണ് ജില്ലയില് നിന്നാണ് പിടികൂടിയത്.
പേര് രാഹുലിന്റേതാണെങ്കിലും ലൈസന്സിലെ മേല്വിലാസം സ്ഥലത്തെ ജില്ലാ മജിസ്ട്രേറ്റിന്റേതാണ്. ജില്ലാ ട്രാന്സ്പോര്ട്ട് ഓഫീസര് പുനീതാ ശ്രീവാസ്തവ കഴിഞ്ഞ മേയ് 18 നാണ് ലൈസന്സ് നല്കിയത്.
രാഹുല് ഗാന്ധിയുടെ പേരിലുള്ള ലൈസന്സില് പിതാവിന്റെ പേരായി രാജീവ്ഗാന്ധി എന്ന് തന്നെയാണ് ചേര്ത്തിരിയ്ക്കുന്നത്. ഇതൊക്കെ കണ്ടിട്ടും ആര്ടിഒ ഓഫീസിലെ ഉദ്യോഗസ്ഥര്ക്ക് മേല്വിലാസക്കാരന് വ്യാജനാണെന്ന് കണ്ടുപിടിയ്ക്കാന് കഴിഞ്ഞില്ല.
എന്നാല് ലൈസന്സിലെ ഒപ്പ് തന്റേതല്ലെന്നും മുദ്ര വ്യാജമാണെന്നുമാണ് പുനീത ഇപ്പോള് പറയുന്നത്. ബീഹാറില് പ്രമുഖരുടെ പേരില് വ്യാജ ലൈസന്സ് ലഭ്യമാകുന്നത് ആദ്യമായിട്ടൊന്നുമല്ല. തമിഴ്പുലി നേതാവ് പ്രഭാകരന്റെ പേരിലുള്ള ലൈസന്സും ബീഹാറിലെ വിരുതന്മാര് സൃഷ്ടിച്ചിരുന്നു.