നമ്പര് തെറ്റിയതിന് യുവാവിന്റെ തല മുണ്ഡനം ചെയ്തു
ഭിവാനി: തെറ്റായ ഫോണ് നമ്പര് ഡയല് ചെയ്തുവെന്ന കുറ്റത്തിന് ദളിത് യുവാവിനെ തല മുണ്ഡനം ചെയ്ത് പരസ്യമായി തെരുവില് നടത്തി.
ഹരിയാനയിലെ ഭിവാനി ജില്ലയിലെ ധാനി രാംജാസ് ഗ്രാമത്തിലെ സുരേഷിനെയാണ് തലമുണ്ഡനം ചെയ്ത് പരസ്യമായി നടത്തിച്ചത്.
ഒരു പരിചയക്കാരനെ വിളിക്കാന് വേണ്ടി തിങ്കളാഴ്ച സുരേഷ് ഡയല് ചെയ്ത നമ്പര് തെറ്റി കോള് മറ്റൊരാള്ക്ക് പോയി. അതേ ഗ്രാമത്തിലെതന്നെ ധരം സിങ് എന്നയാളുടെ നമ്പറാണ് സുരേഷ് ഡയല് ചെയ്തത്. തെറ്റ് മനസ്സിലാക്കിയ സുരേഷ് മാപ്പ് പറഞ്ഞ് ഉടന്തന്നെ ഫോണ് ഡിസ്കണക്ട് ചെയ്തു.
ചൊവ്വാഴ്ചയാണ് സുരേഷിന് ഇതിന്റെ ശിക്ഷ ലഭിക്കുന്നത്. ധരംസിങും മറ്റ് ആറുപേരും വന്ന് സുരേഷിനെ ബലമായി പിടിച്ചുകൊണ്ടുപോയി തല മുണ്ഡനം ചെയ്ത് മോട്ടോര് സൈക്കിളില് കെട്ടിയിട്ട് തെരുവ് മുഴുവന് നടത്തിച്ചു.
വഴിനീളെ സുരേഷിനെ സംഘം മര്ദ്ദിക്കുകയും ചെയ്തിട്ടുണ്ട്. ഇത്രയും ചെയ്തുവെന്ന് മാത്രമല്ല ഇതുസംബന്ധിച്ച് പൊലീസില് പരാതിപ്പെട്ടാല് വേറെ പല ഭവിഷത്തുകളും അനുഭവിക്കേണ്ടിവരുമെന്ന് സംഘം സുരേഷിനെ ഭീഷണിപ്പെടുത്തുകയും ചെയ്തു.
സംഭവം വാര്ത്തയായെങ്കിലും പൊലീസ് ഇതേവരെ ധരംസിങിനും സംഘത്തിനുമെതിരെ കേസ് രജിസ്റ്റര് ചെയ്തിട്ടില്ല. ഇതില് പ്രതിഷേധിച്ച് ദളിത് സംഘടനകള് രംഗത്തെത്തിയിട്ടുണ്ട്.