പോളിന്റെ കാറിലെ ബാഗ്: പൊലീസ് തെളിവെടുത്തു
കൊല്ലം: കൊല്ലപ്പെട്ട രാത്രിയില് പോള് മുത്തൂറ്റ് സഞ്ചരിച്ചിരുന്ന എന്ഡവര് കാറിലുണ്ടായിരുന്നുവെന്ന് പറയപ്പെടുന്ന ലേഡീസ് ബാഗ് കാണാതായതുമായി ബന്ധപ്പെട്ട് പൊലീസ് തെളിവെടുത്തു.
കൊല്ലം എസ്പി ചവറ സ്റ്റേഷനിലെത്തിയാണ് തെളിവെടുത്തത്. സംഭവത്തില് ചവറ സിഐക്കെതിരെ നടക്കുന്ന അന്വേഷണത്തിന്റെ ഭാഗമായിട്ടാണ് വെള്ളിയാഴ്ച തെളിവെടുപ്പ് നടന്നത്.
കൊലപാതകത്തെത്തുടര്ന്ന് പോളിന്റെ കാര് ചവറയില് വച്ച് കണ്ടെടുക്കുമ്പോള് അതില് സ്ത്രീകള് ഉപയോഗിക്കുന്ന തരത്തിലുള്ള ഒരു ബാഗും ചുരിദാറും ആഭരണങ്ങളും ഉണ്ടായിരുന്നുവെന്നും പൊലീസിന്റെ സഹായത്തോടെ ഇതെല്ലാം ആരോ മാറ്റുകയായിരുന്നുവെന്നുമാണ് ആരോപണം.
പോള് കൊല്ലപ്പെടുമ്പോള് അദ്ദേഹത്തോടൊപ്പം ഒരു പ്രമുഖ താരം കാറില് സഞ്ചരിച്ചുവെന്നും അവരുടേതാണ് ഈ ബാഗും വസ്ത്രവുമെന്നുമാണ് വാര്ത്തകള് പരക്കുന്നത്. നടിമാരുടെ പേരില് ഒരു സീരിയല് നടിയുടേതുമുതല് മലയാളത്തിലെ മുന്നിര നായികമാരുടെ പേരുകളെല്ലാം പറഞ്ഞുകേള്ക്കുന്നുണ്ട്.
ആദ്യം സീരിയല് നടിതന്നെയായിരുന്നു ഒപ്പമുണ്ടായിരുന്നതെന്നായിരുന്നു വാര്ത്ത പരന്നത്. ഇപ്പോള് തെന്നിന്ത്യയിലെ ഒരു പ്രമുഖ നടിയുടെയും തിരിച്ചുവരവിനൊരുങ്ങുന്ന മലയാളി നടിയുടെയും എല്ലാം പേരുകള് പറഞ്ഞു കേള്ക്കുന്നു. ഇതാരായിരുന്നുവെന്ന കാര്യത്തില് പൊലീസിന് ഇതേവരെ വ്യക്തമായ തെളിവുകള് ലഭിച്ചിട്ടില്ല.
പോളിന് മയക്കുമരുന്നിലും സ്ത്രീകളിലും അതീവ താല്പര്യമുണ്ടായിരുന്നുവെന്നും വഴിവിട്ട ജീവിതമായിരുന്നു ഇദ്ദേഹം നയിച്ചിരുന്നതെന്നും കഥകളുണ്ട്. പ്രമുഖ ക്വട്ടേഷന് സംഘങ്ങളുമായി ബന്ധം പുലര്ത്തിയിരുന്ന പോളിന് മയക്കുമരുന്ന് മാഫിയയുമായും ബന്ധമുണ്ടായിരുന്നുവെന്നും കഥകള് പരക്കുന്നുണ്ട്. കൂടുതല് തെളിവുകള്ക്കായി പോളിന്റെ മൊബൈല് ഫോണുകളും ലാപ്ടോപ് കമ്പ്യൂട്ടറും പൊലീസ് പരിശോധിക്കുന്നുണ്ട്.