ഐഎസ്‌ആര്‍ഒ ചൊവ്വാ ദൗത്യത്തിനൊരുങ്ങുന്നു

ദില്ലി: ചാന്ദ്ര ദൗത്യത്തിന്‌ പിന്നാലെ ഐഎസ്‌ആര്‍ഒ ചൊവ്വ പര്യവേഷണത്തിന്‌ ഒരുക്കം നടത്തുന്നു. ഇന്ത്യയുടെ പ്രഥമ ചൊവ്വാ ദൗത്യം 2015ന്‌ മുമ്പായി നടക്കുമെന്ന്‌ ഐഎസ്‌ആര്‍ഒ ചെയര്‍മാന്‍ ജി മാധവന്‍ നായര്‍ അറിയിച്ചു.

2013നും 2015നും മധ്യേ ദൗത്യം യാഥാര്‍ത്ഥ്യമാക്കാന്‍ കഴിയുമെന്നാണ്‌ ഐഎസ്‌ആര്‍ഒയുടെ കണക്കുകൂട്ടല്‍. ചൊവ്വയിലേയ്‌ക്ക്‌ ഉപഗ്രഹം അയക്കുന്നതുമായി ബന്ധപ്പെട്ട പ്രാഥമിക പഠനങ്ങള്‍ പൂര്‍ത്തിയായിക്കഴിഞ്ഞെന്നും മാധവന്‍ നായര്‍ അറിയിച്ചു.

ആറ്‌ വര്‍ഷം കൊണ്ട്‌ ലക്ഷ്യം നേടാന്‍ കഴിയുമെന്നാണ്‌ ഐഎസ്‌ആര്‍ഒയുടെ പ്രതീക്ഷ. ചന്ദ്രയാന്‍ ദൗത്യം ഔദ്യോഗികമായി അവസാനിപ്പിച്ചതിന്‌ പിന്നാലെയാണ്‌ ഐഎസ്‌ആര്‍ഒ ചൊവ്വാ ദൗത്യം പ്രഖ്യാപിച്ചിരിക്കുന്നത്‌.

ചന്ദ്രനില്‍ വിജയകരമായി ഉപഗ്രഹത്തെ എത്തിക്കാന്‍ കഴിഞ്ഞ ആത്മവിശ്വാസത്തിലാണ്‌ ഐഎസ്‌ആര്‍ഒയിലെ ശാസ്‌ത്രജ്ഞര്‍ ചൊവ്വാ ദൗത്യത്തിലേയ്‌ക്ക്‌ തിരിയുന്നത്‌.

ചൊവ്വാ ദൗത്യത്തിനുള്ള പ്രാഥമിക മൂലധനമായി സര്‍ക്കാര്‍ 10കോടി രൂപ ഐഎസ്‌ആര്‍ഒയ്‌ക്ക്‌ അനുവദിച്ചിട്ടുണ്ട്‌. ഉപഗ്രഹ വിക്ഷേപണത്തിന്‌ ആവശ്യമായി വരുന്ന ശാസ്‌ത്രീയ പരീക്ഷണങ്ങളെക്കുറിച്ച്‌്‌ പഠനം നടത്തുന്നതിനായിരിക്കും ഈ തുക ഉയോഗിക്കുക.