പന്നിപ്പനി: ബാംഗ്ലൂരില്‍ എന്‍ജിനീയര്‍ മരിച്ചു

ബാംഗ്ലൂര്‍: പന്നിപ്പനി ബാധിച്ച് ചികിത്സയില്‍ കഴിയുകയായിരുന്ന സോഫ്റ്റ്‌വെയര്‍ എഞ്ചിനീയര്‍ മരിച്ചു. തമിഴ്‌നാട് സ്വദേശിയായ ഇയാള്‍ അമേരിക്കന്‍ ആസ്ഥാനമായ ഐ.ടി കമ്പനിയില്‍ എഞ്ചിനീയറായിരുന്നു.

ന്യൂമോണിയ ബാധിച്ച ഇയാളെ കഴിഞ്ഞ ആഗസ്ത് 28നാണ് ലേക്ക്‌സൈഡ് ആസ്​പത്രിയില്‍ പ്രവേശിപ്പിച്ചത്. മൂന്ന് ദിവസമായി വെന്റിലേറ്ററിലായിരുന്നു.ബുധനാഴ്ച കാലത്താണ് മരണം നടന്നത്.

ഇതോടെ കര്‍ണാടകത്തില്‍ എച്ച് 1 എന്‍ 1 വൈറസ് ബാധിച്ച് മരിക്കുന്നവരുടെ എണ്ണം 28 ആയി. സംസ്ഥാനത്ത് പുതിയതായി 22 എച്ച് 1 എന്‍ 1 കേസുകള്‍ കൂടി റിപ്പോര്‍ട്ട് ചെയ്യപ്പെട്ടിട്ടുണ്ട്.

ഇതില്‍ 14 എണ്ണം ബാംഗ്ലൂരില്‍ നിന്നും ആറെണ്ണം ബെല്‍ഗാമില്‍ നിന്നും രണ്ടെണ്ണും മൈസൂരില്‍ നിന്നുമാണ് റിപ്പോര്‍ട്ട് ചെയ്യപ്പെട്ടിട്ടുള്ളത്. ഇതിനിടെ പൂനെയില്‍ പന്നിപ്പനി ബാധിച്ച് മരിച്ചവരുടെ എണ്ണം 33ആയിഉയര്‍ന്നു.